İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 196 Hüküm no: 165 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Yorgi’nin mâlik olduğu bakkal dükkânını, vârislerinin Seyyid Süleyman Alemdar ve Helvacı Ali Ağa’ya sattıkları Bahçekapısı’nda bir bâb bakkāl gediği iştirâken Nüshateyn Vilâyet-i Rumeli’nde Tekfurdağı kazâsına tâbi‘ Yeniköy’de mütemekkin iken bundan akdem hâlik olan Bakkāl Yorgi v. Yorgi zimmînin verâseti zevce-i metrûkesi Kiryaki bt. Yorgi Nasrâniye ile sulbî kebîr oğlu Dimitri zimmî ve sulbiye kebîre kızları Magdeleni ve Elince Nasrâniyelere münhasıra ba‘dehû zevce-i mersûme ba‘dehû Kiryaki Nasrâniye dahi hâlike olup verâseti sadrî kebîr oğlu mersûm Dimitri zimmî ve sadriye-i kebîre kızları mesfûretân Magdeleni ve Elince Nasrâniyelere münhasıra ba‘dehâ mersûm Dimitri zimmî dahi hâlik olup verâseti li-ebeveyn kız karındaşları mersûmetân Magdeleni ve Elince Nasrâniyeler ile li-ebeveyn ammi Yenaki zimmîye münhasıra ve mesele-i mîrâsları bi-hükmi’l-münâsahati’ş-şer‘iye doksan altı sehmden olup sihâm-ı mezbûreden kırkar sehmi mersûmetân Magdeleni ve Elince Nasrâniyelerden her birine ve bâkī on altı sehmi mesfûr Yenaki zimmîye isâbeti tahakkukundan sonra mersûm Magdeleni Nasrâniyenin zevci ve tarafından husûs-ı âtiyyü’l-beyânda vekîl olduğu şahsını bilir Yamandi v. İsteraki ve Aci Yorgaki v. Andon nâm zimmîler şehâdetleriyle ber-nehc-i şer‘î sâbit olan diğer Andon v. Panayot nâm zimmî ve mersûme Elince Nasrâniye ile mesfûr Yenaki zimmî taraflarından kezâlik husûs-ı âti’z-zikrde vekîlleri olduğu şahs-ı mersûmeyi bilir mesfûr diğer Andon ve Yorgaki v. Yani nâm zimmîler şehâdetleriyle ber-nehc-i şer‘î sâbit olan Nikoli v. Yani nâm zimmî meclis-i şer‘-i hatîr-i lâzımü’t-tevkīrde Marya bt. Yorgaki v. Adami nâm Nasrâniyenin oğlu ve tarafından husûs-ı câi’z-zikrde vekîl olduğu şahsını bilir Yorgaki ve Nikoli veledey Yani nâm zimmîler şehâdetleriyle kezâlik ber-nehc-i şer‘î sâbit olan mesfûr Aci Yorgaki nâm zimmî vekâleten ve mersûmân Yorgaki ve Nikola veledey el-mersûm Yani zimmîler asâleten hâzır oldukları hâlde işbu bâ‘iseyü’l-kitâb es-Seyyid Süleyman Alemdar b. Mustafa ve Helvacı Ali Ağa b. İsmail mahzarlarında hâzırûn-ı mesfûrûnun bi’l-vekâle ve bi’l-asâle ber-vech-i âtî tasdîkleriyle her biri bi’l-vekâle ikrâr-ı tam ve takrîr-i kelâm edip mahmiye-i İstanbul’da Bahçekapısı hâricinde vâki‘ Katranciko dükkânı demekle ma‘rûf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle on altı sehmi bâ-hüccet-i şer‘iye şirâen ve on altı buçuk sehmi irsen ki cem‘an otuz iki buçuk sehmi hâlik-i evvel-i mersûm Bakkāl Yorgaki zimmînin ile’l-helâk yedinde mâlı ve mülkü ve ba‘de helâkihî bi-tarîki’l-münâsahati’ş-şer‘iye müvekkiletân-ı mersûmetân Magdeleni ve Elince Nasrâniyeler ile müvekkil-i mesfûr Yenaki zimmîye mevrûs mâlları ve on beş sehmi müstakılleten vekîl-i hâzır-ı mesfûrun müvekkilesi mersûme Marya Nasrâniyenin mâlı ve yetmiş iki buçuk sehmi hâzırân-ı mesfûrân Yorgaki ve Nikoli zimmîlerin bâ-hüccet-i şer‘iye iştirâken mâlları ve mülkleri olmağın biz âlât-ı lâzıme-i ma‘lûmeden ber-i‘tibâr-ı merkūm müvekkillerimiz mesfûretân Magdeleni ve Elince Nasrâniyeler ile Yenaki zimmînin akd-i âti’z-zikrin sudûruna değin yedlerinde mâl-ı mevrûsları olan otuz iki buçuk sehm hisse-i şâyi‘alarını bin altı yüz yirmi beş guruşa ve vekîl-i hâzır-ı mesfûr Aci Yorgaki zimmî müvekkilesi mersûme Marya Nasrâniyenin kezâlik âlât-ı lâzıme-i mezkûreden ber-i‘tibâr-ı merkūm mâlike olduğu on beş sehm hisse-i şâyi‘asını yedi yüz elli guruşa ve hâzırân-ı mesfûrân Yorgaki ve Nikoli zimmîler kezâlik âlât-ı lâzıme-i mezkûreden ber-i‘tibâr-ı mezkûr mâlikler oldukları yetmiş iki buçuk sehm hisse-i şâyi‘alarını üç bin altı yüz yirmi beş guruşa ki cem‘an altı bin guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve bakkālân pazarbaşısı ve bölükbaşı ve bi’l-cümle nizâm ustaları re’y ve ma‘rifetleriyle bi’l-vekâle ve bi’l-asâle mezbûrân es-Seyyid Süleyman Alemdar ve Helvacı Ali Ağa’ya ale’l-iştirâki’s-seviyy bey‘ ve temlik ve teslîm eylediğimizde onlar dahi seviyyen iştirâken iştirâ ve temellük ve tesellüm ve kabz ü kabûl ve semeni olan meblağ-ı mecmû‘-ı mezkûr altı bin guruşu bizimle hâzırûn-ı mersûmuna def‘ ü teslîm eylediklerinde biz ve hâzırûn-ı mersûmuna dahi bi’l-vekâle ve bi’l-asâle bâlâda terkīm olunduğu üzere yedlerinde bi-kadri’l-hısas bi’t-tamam ve’l-kemâl ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan müvekkillerimiz mesfûruna izâfetle biz ve hâzır-ı vekîl-i mersûm bi’l-vekâle ve hâzırân-ı mesfûrân bi’l-asâle mezbûrân [40a] es-Seyyid Süleyman Alemdar ve Helvacı Ali Ağa’nın zimmetlerini ibrâ-i âmm-ı sahîh-i şer‘î ile ibrâ ve iskāt eylediğimizde onlar dahi husûs-ı mezkûra müte‘allika âmme-i da‘vâdan kezâlik bizim ve müvekkilûn-ı mesfûrun ve hâzırûn-ı mesfûrûnun zimmetimizi ibrâ ve iskāt ve her birimiz âharın ibrâsını kabûl edip fîmâ-ba‘d zikr olunan Katranciko dükkânı demekle ma‘rûf bir bâb bakkāl dükkânı derûnunda mevcûde gedik ta‘bîr olunur âlât-ı lâzıme-i ma‘lûmede müvekkillerimiz mesfûretân Mağdeni ve Elince Nasrâniyelerin ve mesfûr Yenaki zimmînin ve vekîl-i hâzır-ı mesfûrun müvekkilem mesfûre Marya Nasrâniyenin ve hâzırân-ı mesfûrân Yorgaki ve Nikoli zimmîlerin kat‘a alâka ve medhalleri kalmayup bâlâda tahrîr olunduğu üzere yüz yirmi sehm i‘tibâriyle altmış sehm mezbûr es-Seyyid Süleyman Alemdar’ın ve altmış sehmi merkūm Helvacı Ali Ağa’nın seviyyen mâl-ı müşterâları ve hakk-ı sırfları olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 16 Ca sene 1238. Şühûdü’l-hâl: Pazarbaşı Süleyman Ağa, Mehmed İbiş, Bölükbaşı Abdi, Ahmed Alemdar, Kâtib Ahmed Efendi, Berber İbrahim Usta, Kethudâ Emiroğlu es-Seyyid İbrahim.