İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 198 Hüküm no: 166 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Lambek v. Yuvakim’in vârislerinin iki adet mumhane gediğini İsmail Ağa b. Mehmed’e sattıkları Medîne-i Üsküdar’da iki bâb mumhâne Mahrûse-i Galata’ya [muzâfe] İstinye nâhiyesine tâbi‘ Bey karyesinde mütemekkin iken bundan akdem hâlik olan Sarrâf Lambek v. Yuvakim nâm zimmînin verâseti zevce-i metrûkesi Torlo v. Yuvan nâm Nasrâniye ile sulbî kebîr oğulları Paskal ve Zoteri ve Dimitri ve Yorgaki ve Kigori zimmîler ve sulbiye kebîre kızı Katerina Nasrâniyeye ba‘de’l-inhisâr mesfûr Paskal zimmînin sulbî kebîr oğlu ve tarafından husûs-ı âti’l-beyânda vekîl olduğu mesfûrân Yorgaki ve Kigori zimmîler şehâdetleriyle ber-nehc-i şer‘î sâbit olan Yuvakim nâm zimmî ve kendi nefsinden asıl ve karındaşı mersûm Dimitri zimmî tarafından husûs-ı âtiyyü’l-beyânda vekîl olduğu mersûmân Yuvakim ve Kigori zimmîler şehâdetleriyle kezâlik ber-nehc-i şer‘î olan mesfûr Zoteri zimmî ve yine kendi nefsinden asıl ve anası zevce-i mersûme Tolo Nasrâniye tarafından husûs-ı âti’z-zikrde vekîl olduğu şahs-ı mersûmeyi bilir Kostandi v. Tanaş ve Yandeli v. Dimitri nâm zimmîler şehâdetleriyle ve mersûme Katerina Nasrâniye tarafından husûs-ı câi’z-zikrde vekîl olduğu kezâlik şahs-ı mersûme[yi] bilir mesfûrân Yuvakim ve Kigori zimmîler şehâdetleriyle kezâlik ber-nehc-i şer‘î sâbit olan mersûm Yorgaki zimmîden her biri asâleten ve vekâleten ve mesfûr Kigori zimmî asâleten meclis-i şer‘-i hatîr-i lâzımü’t-tevkīrde mumcu esnâfından işbu bâ‘isü’l-kitâb el-Hâc İsmail Ağa b. Mehmed nâm kimesne mahzarında her biri ikrâr-ı tam ve takrîr-i kelâm edip medîne-i Üsküdar’da iskele-i kebîr kurbünde kâin Hasan Ağa mumhânesi demekle arîf ma‘lûmü’l-hudûd bir bâb mumhâne derûnunda mevcûde beyne’l-esnâf gedik ta‘bîr olunur üç fıçı ve dört iskemle ve bir kazgan ve bir kefçe ve bir satır ve iki çubuk ve bir mingene ve bir kantar ve sâir âlât-ı lâzıme-i ma‘lûme ile yine medîne-i mezbûreye muzâfe Yoros nâhiyesine tâbi‘ İncir karyesinde Paşabahçe nâm mahâlde vâki‘ kezâlik ma‘lûmü’l-hudûd diğer bir bâb mumhâne derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmeden her biri dörder sehm i‘tibâriyle ikişer sehmi âharın ve birer sehmi merkūm el-Hâc İsmail Ağa’nın mâlları olup mâ-hadleri olan birer sehmi dahi mûrisimiz hâlik-i mesfûr Sarrâf Lambek zimmînin ile’l-helâk bâ-hüccet-i şer‘iye yedinde mâlı ve mülkü ve ba‘de helâkihî veresesi müvekkilûn-ı mesfûrun ile bize mevrûs olmağla biz zikr olunan iki bâb mumhânelerin gedik âlât-ı merkūmesinin her birinden ber-i‘tibâr-ı merkūm birer sehm hisse-i şâyi‘a-i mezkûremizi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîk-i âharlarımız izin ve icâzetleriyle iki bin guruşa mezbûr el-Hâc İsmail Ağa’ya bi’l-verâse ve bi’l-vekâle bey‘ ve temlik ve vech-i lâyıkı üzere teslîm eylediğimizde ol dahi yedimizden iştirâ ve temellük ve tesellüm ve kabz ü kabûl ve semenleri olan meblağ-ı merkūm iki bin guruşu bize def‘ ü teslîm eylediğinde biz dahi yedinden her birimiz asâleten ve vekâleten bi-kadri’l-hısas ahz ü kabz edip mebî‘ayn-ı mezkûreynin tağrîr ve gabnine müte‘allika âmme-i da‘vâdan her birimiz bi’l-asâle ve müvekkilûn-ı mesfûruna izâfetle bi’l-vekâle mezbûr el-Hâc İsmail Ağa’nın zimmetini ibrâ ve iskāt eylediğimizde ol dahi husûs-ı mezkûra müte‘allika âmme-i da‘vâdan kezâlik bizim ve müvekkilûn-ı mesfûrûnun zimmetimizi ibrâ ve iskāt ve her birimiz asâleten ve vekâleten âharın ibrâsını kabûl edip fîmâ-ba‘d zikr olunan iki bâb mumhâneler gedikleri olan âlât-ı lâzıme-i mezkûreden bizim ve müvekkilûn-ı mesfûrûnun kat‘a alâka ve medhalimiz kalmayup bâlâda zikr olunduğu üzere her biri dörder sehm i‘tibâriyle birer sehmi mukaddemâ ve birer sehmi hâlâ ber-minvâl-i muharrer şirâen ki cem‘an her birinin ikişer sehmi merkūm el-Hâc İsmail Ağa’nın mâlı ve mülkü ve hakk-ı sırfı olmuşdur dediklerinde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 Ca sene 1238. Şühûdü’l-hâl: Ali Ağa b. Mehmed, Kethudâ Ali b. Ebûbekir, Kethudâ vekîli diğer Ali Ağa, Yazıcı Süleyman Efendi b. Ahmed, Yiğitbaşı İslâm Usta.