İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 214 Hüküm no: 183 Orijinal metin no: [43b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hatun bt. Mustafa’nın mâlik olduğu kebapçı ve hoşafçı dükkânını Halil Beşe b. Osman’a sattığı Kebâbcı ve hoşâbcı Mahmiye-i İstanbul hısnı ebvâbından Kapan-ı dakīk kapısı dâhilinde Soğancılar mahallesinde sâkine Rabia Hatun bt. Mustafa tarafından husûs-ı âti’l-beyânı ikrâra ve i‘tâ-i hüccete vekîl olduğu zât-ı mezbûreyi ma‘rifet-i şer‘iye ile ârifân Yiğitbaşı Ali Ağa b. Hüseyin ve Mehmed Eşref Ağa b. Mustafa nâm kimesneler şehâdetleriyle ber-nehc-i şer‘î sâbit olan Mehmed Emin Ağa b. Ahmed nâm kimesne meclis-i şer‘-i şerîf-i enverde müvekkile-i mezbûrenin zevci işbu bâ‘isü’l-kitâb Halil Beşe b. Osman nâm kimesne mahzarında [44a] bi’l-vekâle ikrâr-ı tam ve takrîr-i kelâm edip müvekkile-i mezbûre Rabia Hatun mahmiye-i mahkiyede Sultan Mehmed Han Câmi‘-i şerîfi << civârında >> kurbünde Büyük Karaman nâm mahâlde vâki‘ işkenbeci dükkânı karşısında kâin bir bâb kebapçı ve hoşâbçı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle kırk sehmi zevcim mezbûr Halil Beşe’nin ve altmış sehmi Peredomoz zimmînin ve mâ‘adâ yirmi sehm hisse-i şâyi‘ası benim yedimizde iştirâken mâlımız ve mülkümüz olmağla ben âlât-ı lâzıme-i mezkûreden ber-i‘tibâr-ı merkūm akd-i âti’z-zikrin sudûruna değin bâ-hüccet mâlike olduğum yirmi sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîk-i mesfûrun izin ve icâzetiyle zevcim mezbûr Halil Beşe’ye altı yüz guruşa bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm altı yüz [guruşu] bana def‘ ü teslîm ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d yirmi sehm hisse-i şâyi‘ada benim kat‘a alâka ve medhalim kalmayup zevcim merkūm Halil Beşe’nin mülk-i müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 14 Ca sene 1238. Şühûdü’l-hâl: Kethudâ Hüseyin Ağa, Yiğitbaşı Ali Ağa, Mehmed Eşref Ağa, Bahçekapılı el-Hâc Hüseyin Ağa, sâbık Kethudâ es-Seyyid el-Hâc Hasan Ağa.