İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 214 Hüküm no: 182 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanes v. Tomas’ın mâlik olduğu kuyumcu dükkânını kardeşi Agop’a sattığı Kuyumcu Mahmiye-i İstanbul’da kâin kuyumcu esnâfından Avanes v. Tomas nâm zimmî meclis-i şer‘-i hatîr-i lâzımü’t-tevkīrde li-ebeveyn er karındaşı işbu bâ‘isü’l-kitâb Agop nâm zimmî muvâcehesinde ikrâr-ı tam ve takrîr-i kelâm edip mahmiye-i mahkiyede bezzâzistân-ı atik karşısında vâki‘ incüci Yahûdî dükkânına muttasıl şehriye seksen yedi para kadîm kirâlı ma‘lûmü’l-hudûd bir bâb kuyumcu dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan bir örs ve bir çekiç ve bir peştahta ve bir akçe tahtası ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide [ile] karındaşım mersûm Agop zimmîye üç bin dört yüz guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin dört yüz guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i muharrere-i mezkûrede benim kat‘a alâka ve medhalim kalmayup karındaşım mersûm Agop zimmînin mâlı ve mülkü olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 26 Ca sene 1238. Şühûdü’l-hâl: Eş-şâhidûne’s-sâbıkūn.