İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 216 Hüküm no: 185 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anton v. Kasbar’ın bakkal dükkânını Anaştaş v. Mihal’e sattığı Bakkāl Mahmiye-i İstanbul’da bakkāl tâifesinden Anton v. Kasbar nâm zimmî meclis-i şer‘-i hatîr-i lâzımü’t-tevkīrde esnâf-ı mezkûreden işbu hâmilü’r-rakīm Anaştaş v. Mihal nâm zimmî tarafından husûs-ı âti’l-beyânı tasdîka vekîl-i şer‘îsi babası mersûm ( ) v. Nikola nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Topkapı dâhilinde vâki‘ el-Hâc Yusuf dükkânı demekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharın ve mâ‘adâ altmış sehm hisse-i şâyi‘ası benim yedimizde bâ-hüccet-i şer‘iyye iştirâken mâlımız ve mülkümüz olmağın ben âlât-ı lâzıme-i ma‘lûmeden ber-i‘tibâr-ı merkūm mâlik olduğum altmış sehm hisse-i şâyi‘amın otuz sehmini işbu târih-i kitâb günü semen-i makbûza diğer bir kıt‘a hüccet mûcebince vekîl-i mersûm Mihal zimmîye bey‘ etmemle mâ‘adâsı olup akd-i âti’z-zikrin sudûruna değin yedimde mâlım olan otuz sehm hisse-i şâyi‘amı dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîk-i âharım izin ve icâzeti ve bakkālân pazarbaşısı ve bölükbaşısı ve bi’l-cümle nizâm ustaları ma‘rifetleriyle müvekkil-i mersûm Anaştaş zimmîye bin iki yüz guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin iki yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d otuz sehm hisse-i şâyi‘ada benim kat‘a alâka ve medhalim kalmayup müvekkil-i mersûm Anaştaş zimmînin mâlı ve mülkü olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 16 Ca sene [1]238. Şühûdü’l-hâl: Eş-şâhidûne’s-sâbıkūn.