İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 217 Hüküm no: 186 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kabamacı Yazıcıoğlu Toros’un mâlik olduğu kumaşçı dükkânını vârislerinin Nonya Nasrâniye’ye sattığı Kumaşçı dükkânı mübâya‘ası 5.000 guruş Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri içün bi’l-iltimas savb-ı şer‘-i enverden me’zûnen Kâtib Abdullah Efendi irsâl olunup ol dahi mahmiye-i İstanbul’da Langa-i kebîr civârında Kâtib Kasım mahallesinde kâin mukaddemâ hâlik olan Kabamacı Yazıcıoğlu Toros zimmînin menziline varıp zeyl-i vesîkada muharrerü’l-esâmî kimesneler hâzır oldukları hâlde akd-i meclis-i şer‘-i âlî ettikde mahmiye-i mezbûrede kâin kazzâz esnâfından Agop v. Aci Takfor nâm zimmî meclis-i ma‘kūd-ı mezkûrda hâlik-i mesfûr Toros zimmînin sulbiye kebîre kızı olup şahsı ta‘rîf-i şer‘î ile mu‘arrefe olan bâ‘isetü’s-sifr Nonya Nasrâniye muvâcehesinde ikrâr-ı tam ve takrîr-i kelâm edip mahmiye-i mahkiyede bezzâzistân-ı atik ebvâbından Sahhâflar kapısı karşı sırasında kâin Kumaşçı Agop zimmî ile mersûme Nonya Nasrâniye dükkânları beynlerinde kâin iki kepenk bir bâb kumaşçı dükkânı derûnunda mevcûde mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûmenin kırk sekiz sehm i‘tibâriyle on dört sehmi benim ve on dört sehmi işbu hâzır bi’l-meclis karındaşım Artin zimmînin ve yedişer sehmden on dört sehmi diğer kız karındaşlarım Aranik ve Sofya Nasrâniyelerin ve altı sehmi anamız hâlike Serpohi Nasrâniyeden her birimizin işbu yedimizde olan bir kıt‘a hüccet-i şer‘iye natîk olduğu üzere mâlımız ve mülkümüz iken anamız mersûme hâlike oldukda âlât-ı mezkûreden i‘tibâr-ı merkūm üzere mâlike olduğu altı sehminin ikişer sehmden dört sehmden dört sehmi benimle hâzır-ı mersûm karındaşım Artin zimmîye ve birer sehmden iki sehmi kız karındaşlarım mersûmetâna mevrûs olmağın ol-vechile âlât-ı lâzıme-i mezkûreden i‘tibâr-ı mezbûr üzere akd-i âti’z-zikrin sudûruna değin benim yedimde mâlım ve mülküm olan cem‘an on altı sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve karındaşım hâzır-ı mersûm ile kız karındaşlarım mersûmetân Aranik ve Sofya Nasrâniyelerin izin ve icâzetleriyle mersûme Nonya Nasrâniye’ye beş bin guruşa bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm beş bin guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ve iskāt-ı tamm-ı sarîh-i mer‘î ile ibrâ ve iskāt dahi etmemizle fîmâ-ba‘d zikr olunan on altı sehm hisse-i şâyi‘ada benim kat‘a alâka ve medhalim kalmayup mersûme Nonya Nasrâniyenin mâl-ı müşterâsı ve hakk-ı sırfı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîki’ş-şer‘î vaki‘i hâli kâtib-i mezbûr mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 28 Ca sene [1]238. Şühûdü’l-hâl: Çukadâr Abdurrahman Ağa b. ( ), Muhzır Molla Mustafa, Yiğitbaşı Mıgırdıç v. Ohannes, Sandalcı v. Takfur, Derzi Ohannes v. Begos, Bezzâz Ohannes v. Margiros, Mesrob v. Agop ve gayruhum.