İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 219 Hüküm no: 188 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından Hanoş v. Andon’un mâlik olduğu sandalcı destgâhını Vardana bt. Mardıros’a sattığı ve birbirlerinin zimmetlerini ibra ettikleri Sandalcı aded 2 Hudâvendigâr-ı esbak cennet-mekân firdevs-âşiyân merhûm-ı mağfiret-nişân Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde kâin bi’l-cümle sandalcı << sandalcı >> destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde tahrîr ü takrîr ve bir aded destgâh iki yüz << guruşdan semen ile >> guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen sandalcı esnâfından Hanoş v. Andon nâm zimmî tarafından husûs-ı âti’l-beyânı ikrâr ve i‘tâ-i hüccete vekîl olduğu Kethudâ es-Seyyid Mehmed Emin Ağa b. es-Seyyid Mustafa ve Yiğitbaşı Ebûbekir Ağa b. Ali nâm kimesneler şehâdetleriyle sâbit olan Karabet v. Mardıros nâm zimmî meclis-i şer‘-i hatîr-i lâzımü’t-tevkīrde esnâf-ı mezkûreden olup bundan akdem hâlik olan Halebli Cenbor v. Andon nâm zimmînin sulbî sagīr oğlu olmağla iki aded destgâha mâlik olan Corci’nin anası ve tesviye-i umûruna bâ-hüccet-i şer‘iye vasî-i mansûbesi olup şahsı ta‘rîf-i şer‘î ile mu‘arrefe olan iş bu bâ‘isetü’s-sifr Vardana bt. Mardıros nâm Nasrâniye muvâcehesinde bi’l-vekâle ikrâr-ı tam ve takrîr-i kelâm edip müvekkilim mesfûr Hanoş zimmî bâlâda mezkûr destgâhlardan akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan iki aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile sagīr-i mersûm içün anası vasiyye-i mersûme Varvara Nasrâniyeye dört yüz guruşa bey‘ ve temlik ve teslîm eylediğimde ol dahi ber-vech-i muharrer bi’l-vesâye sagīr-i mersûm içün bi’l-izni’ş-şer‘î iştirâ ve temellük ve tesellüm ve kabz ü kabûl ve semenleri olan meblağ-ı merkūm dört yüz guruşu sagīr-i mersûmun mâlından bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan sagīr-i mersûm ile anası vasiyye-i mersûme << Varvara >> Varvara Nasrâniye’nin zimmetlerini vasiyye-i mersûmenin kabûlünü hâvî ibrâ ve iskāt dahi etmemizle fîmâ-ba‘d zikr olunan iki aded destgâhda benim kat‘a alâka ve medhalim kalmayup sagīr-i mersûm Corci’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 16 Ca sene 1238. Şühûdü’l-hâl: Muhzır Molla Mahmud, Kethudâ es-Seyyid el-Hâc Hafız Emin Ağa, Muhzır Molla Hüseyin, Muhzır Molla Halil.