İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 218 Hüküm no: 187 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nonya Nasrâniye’nin mâlik olduğu bezzaz dükkânını Ohannes v. Margos’a sattığı Bezzâz << Kabamacı >> Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri içün bi’l-iltimâs savb-ı şer‘-i enverden me’zûnen Kâtib Abdullah Efendi irsâl olunup ol dahi mahmiye-i İstanbul’da Langa-i kebîr civârında Kâtib Kasım mahallesinde kâin mukaddemâ hâlik olan Kabamacı Yazıcıoğlu Toros zimmînin menziline varıp zeyl-i vesîkada muharrerü’l-esâmî kimesneler hâzır oldukları hâlde [akd-i] meclis-i şer‘-i âlî ettikde hâlik-i mersûmun sulbiye kebîre kızı olup şahsı hâzırân-ı mesfûrân ta‘rîfleriyle mu‘arrefe olan Nonya Nasrâniye meclis-i ma‘kūd-ı mezkûrda bezzâz esnâfından hâmilü’r-rakīm Ohannes v. Margos nâm zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da bezzâzistân-ı atik ebvâbından Sahhâflar kapısı karşında vâki‘ işbu yedimde olan bir kıt‘a hüccet-i şer‘iye mantûkunca mukaddemâ Edirnelioğlu Agop zimmî ve el-yevm Edirneli Bezzâz Bedros oğlu Kigork zimmînin bezzâz dükkânına muttasıl bir kepenk bir bâb bezzâz dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin müstakıllen yedimde emvâlim olan bir endâze bir pîş-tahta ve bir mikrâs ve bir akçe tahtası ve sâir âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mesfûr Ohannes zimmîye sekiz bin guruşa bey‘ ve temlik ve vech-i lâyıkı üzere [teslîm] eylediğimde ol dahi ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm sekiz bin guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunan âlât-ı lâzıme-i muharrere-i mezkûrede benim kat‘a alâka ve medhalim kalmayup mersûm Ohannes zimmînin mülk-i müşterâsı ve hakk-ı sırfı olmuşdur << olmuşdur dedikde olsun >> keyfe mâ yeşâ ve hasbemâ yehtâr mâlik ve mutasarrıf olsun dedikde gıbbe’t-tasdîki’ş-şer‘î vâki‘ hâli kâtib-i merkūm mahâllinde ketb ilâ-âhiri. Fî 28 Ca sene [1]238. Şühûdü’l-hâl: Eş-şâhidûne’s-sâbıkūn.