İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 226 Hüküm no: 197 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav Nikola v. Andon’un manav dükkânı gediğini kardeşi Yorgi’ye sattığı 1.100 guruşa manav gediği Medîne-i Üsküdar -meymenet-âsâr-da Yenimahalle’de mütemekkine olup şahsı ta‘rîf-i şer‘î ile mu‘arrefe olan Feroşi bt. Manav Nikola v. Andon nâm Nasrâniye meclis-i şer‘-i hatîr-i lâzımü’t-tevkīrde li-ebeveyn er karındaşı işbu bâ‘isü’s-sifr Yorgi nâm zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da Balık Pazarı Kapısı hâricinde emti‘a gümrüğü civârında Eminönü nâm mahâlde Tokadî Ali Efendi ve Hacı Yusuf oğlu İbrahim Ağa dükkânları beynlerinde kâin bir bâb manav dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yedi sehm i‘tibâriyle bir sehm hissesi benim ve iki sehm hisse-i şâyi‘ası karındaşım mersûm Yorgi zimmînin ve bir sehm hisse-i şâyi‘ası kız karındaşlarım Elisadi ve Konko Nasrâniyelerin ve iki sehmi diğer karındaşım Hıristoforoz nâm zimmînin yedimizde bi-tarîki’l-münâsahati’ş-şer‘iye babam hâlik-i mesfûr Manav Nikola zimmîden mevrûs iştirâken emvâlimiz olmağla ben âlât-ı lâzıme-i mezkûreden akd-i âti’z-zikrin sudûruna değin ber-i‘tibâr-ı mezkûr bâ-hüccet-i şer‘iye mâlike olduğum bir sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şürekâm mesfûrûnun izin ve icâzetleriyle karındaşım mersûm Yorgi zimmîye bin yüz guruşa bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i mezkûrede benim kat‘a alâka ve medhalim kalmayup i‘tibâr-ı merkūm üzere iki sehmi mukaddemâ irsen ve bir sehmi hâlâ şirâen ki cem‘an üç sehm hisse-i şâyi‘a karındaşım mersûm Yorgaki zimmînin mâlı ve mülkü olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 5 C sene 1238. Şühûdü’l-hâl: Pazarbaşı İbrahim Sârım Bey, Bölükbaşı Musa Yazıcı, Molla Mahmud el-Muhzır.