İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 227 Hüküm no: 198 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuvan v. İsak’ın manav dükkânı gediğini Çavuşoğlu Zeynel v. Sava’ya sattığı Manav gediği mübâya‘ası Asl-ı târih-i hüccet fî 7 M sene [12]34. Mahmiye-i İstanbul’da kâin manav esnâfından derûn-ı hüccetde mastûrü’l-ism Yuvan v. İsak nâm zimmî meclis-i şer‘-i hatîr-i lâzımü’t-tevkīrde kezâlik derûn-ı hüccetde mersûmü’l-ism esnâf-ı mezkûreden işbu bâ‘isü’s-sifr Çavuşoğlu Zeynel v. Sava nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede bahçekapısı hâricinde Eminönü nâm mahâlde köşede vâki‘ Manav Ali Ağa dükkânı ile tarîk-i âm beynlerinde vâki‘ şehriye altı guruş kadîm kirâlı bir bâb manav dükkânı derûnunda mevcûde şurût-ı nizâmda dâhil beyne’l-esnâf gedik ta‘bîr olunur iki kantar ve bir terâzî ma‘a derâhim ve bir peştahta ve bir akçe tahtası ve sâir âlât-ı lâzıme-i ma‘lûmenin yüz yirmi [sehim] i‘tibâriyle altmış sehmi mesfûr Zeynel zimmînin yedinde mâlı ve mâ‘adâsı olup derûn-ı hüccetde tahrîr ü beyân olunduğu üzere akd-i âti’z-zikrin sudûruna değin mülk-i müşterâm olan altmış sehm hissemi ben tarafeynden [47a] îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile üç bin guruşa yine sâhib-i evveli mersûm Zeynel? zimmîye bey‘ ü temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup ber-i‘tibâr-ı merkūm altmış sehmi mukaddemâ ve altmış sehmi hâlâ şirâen ki mecmû‘u kemâ-fi’s-sâbık mesfûr Zeynel zimmînin mülkü ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 C sene 1238. Şühûdü’l-hâl: Pazarbaşı es-Seyyid İbrahim Sârım Bey, Muhzır Molla Hüseyin b. Yusuf, Bölükbaşı Musa Yazıcı.