İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 241 Hüküm no: 213 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Süleyman’ın berber dükkânını Mehmed Ağa b. Osman’a sattığı Mercan’da berber gediği mübâya‘asıdır Mahmiye-i İstanbul’da kâin berber esnâfından Ali Ağa b. Süleyman nâm kimesne meclis-i şer‘-i hatîr-i lâzımü’t-tevkīrde Dergâh-ı âlî -dâme mahfûfen bi’l-me‘âlî- yeniçerilerinin yirmi altıncı bölük odası mütevellîsi işbu bâ‘isü’l-kitâb İğneci el-Hâc Mehmed Ağa b. Osman mahzarında Ahmed Beşe b. Mehmed nâm kimesne hâzır olduğu hâlde ikrâr-ı tam ve takrîr-i kelâm edip mahmiye-i mezbûrede Mercan çarşısı kurbünde Vâlide Hanı karşısında kâin Tahtahan demekle ma‘rûf han içinde vâki‘ bir bâb berber dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısfı hâzır-ı mezbûr Hasan Beşe’nin ve nısf-ı âharı benim yedimizde iştirâken mâlımız ve mülkümüz olmağın ben âlât-ı lâzıme-i mezkûreden akd-i âti’z-zikrin sudûruna değin yedimde mâlım ve mülküm olan nısf hisse-i mezkûremi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîkim hâzır-ı mezbûrun izin ve icâzetiyle bin elli guruşa merkūm el-Hâc Mehmed Ağa’ya bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm bin elli guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d nısf âlât-ı lâzıme-i mezkûrede benim kat‘a alâka ve medhalim kalmayup merkūm el-Hâc Mehmed Ağa’nın mâlı ve mülkü olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 26 C sene 1238. Şühûdü’l-hâl: Kethudâ vekîli İbrahim Ağa b. el-Hâc Abdurrahman, Çavuş Mustafa Ağa, eş-Şeyh el-Hâc Musa Efendi b. Mustafa, Du‘âcı el-Hâc Abdullah Efendi b. Ali, Yiğitbaşı es-Seyyid Mehmed Nuri ve gayruhum.