İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 240 Hüküm no: 212 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncuzade Seyyid Mustafa Ağa b. İbrahim’in vârislerinin zeyt yağcı mahzeninin satışı için Yuvan v. Yorgi ve ortağı Kazer v. Nikola’yı vekil tayin ettikleri İdâne-i Zeyt yağcı mahzeni Devlet-i aliyye -dâmet fi’l-himâyeti’r-Rabbâniye-de İstanbul Ağası iken bundan akdem vefât eden Sabuncuzâde es-Seyyid el-Hâc Mustafa Ağa b. İbrahim’in sulbî kebîr oğulları ve hasren vârisleri olup kendi nefsinden asıl ve karındaşı sâbıkā İstanbul Ağası es-Seyyid Mehmed Emin Ağa tarafından husûs-ı âti’l-beyânı ikrâra vekîl olduğu es-Seyyid Ömer Efendi b. Mehmed ve Hüseyin Efendi b. Ahmed nâm kimesneler şehâdetleriyle ber-nehc-i şer‘î sâbit olan es-Seyyid Süleyman Ağa meclis-i şer‘-i hatîr-i lâzımü’t-tevkīrde mahmiye-i İstanbul’da Yenihan’da mütemekkin sarrâf tâifesinden işbu hâmilü’r-rakīm Yuvan v. Yorgi ve şerîki Kazer v. Nikola nâm zimmîler muvâcehelerinde bi’l-asâle ve bi’l-vekâle ikrâr-ı tam ve takrîr-i kelâm edip mahmiye-i mezbûrede Odunkapısı hâricinde Ayazma nâm mahâlde vâki‘ ma‘lûmü’l-hudûd mukaddemâ bir bâb Zeyt yağcı ve bir bâb yumurtacı mahzeni olup hâlâ bir bâb Zeyt yağcı mahzeni derûnunda mevcûde beyne’l-esnâf gedik ta‘bîr olunur Zeyt yağcı âlât-ı lâzıme-i ma‘lûmesi babamız müteveffâ-yı merkūmun ile’l-vefât yedinde mâlı ve mülkü ve ba‘de vefâtihi bize mevrûs olmağla biz ber-vech-i muharrer irsen mâlikler olduğumuz âlât-ı lâzıme-i ma‘lûme-i mezkûreyi karındaşım mezbûr es-Seyyid Mehmed Emin Ağa ile iştirâken şerîkân-ı mersûmân Yuvan ve Kazer zimmîlere zimmetimizde cihet-i karz-ı şer‘îden deynimiz olan yirmi bin guruş mukābilinde rehin vaz‘ ve teslîm eylediğimizde onlar dahi bi’l-ma‘iye irtihân ve kabz ve kabûl etmeleriyle ol-vechile şerîkân-ı mesfûrâna zimmetimizde cihet-i mezkûreden meblağ-ı merkūm yirmi bin guruş sahîhan deynimiz olup eğer deyn-i mezkûru işbu târih-i kitâbdan dört sene tamamına değin bizim içün edâ müyesser olmaz ise mukābilinde rehin olan sâlifü’z-zikr Zeyt yağcı mahzeni gedik ta‘bîr olunur âlât-ı lâzıme-i ma‘lûmemizi semen-i misliyle âhara bey‘ ve semenini kabz ve makbûzları olan semeninden deyn-i mezkûrumuzu istifâ vaz‘ıyla memûr yediyle bize îsâl [50b] ve teslîme ben ve karındaşım mezbûr es-Seyyid Mehmed Emin Ağa’dan her birimiz tarafımızdan küllemâ azelnâkümâ fe-entümâ vekîlünâ mefhûmu üzere azl ü in‘izâlden masûne vekâlet-i devriye-i şer‘iye ile mesfûrân Yuvan ve Kazer zimmîleri ma‘an vekîl ve nâib-i menâb nasb ü ta‘yîn eylediğimizde onlar dahi vekâlet-i merkūmeyi kabûl eylediler dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 20 C sene 1238. Şühûdü’l-hâl: Zeyt yağcı Kethudâsı el-Hâc Hüseyin Ağa, es-Seyyid Ömer Efendi b. Mehmed, İsmail Ağa b. Mustafa, Hüseyin Efendi b. Ahmed, Hasan Ağa b. el-Hâc Hüseyin.