İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 243 Hüküm no: 215 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden sandalcı esnafından Yorgi v. İstefan’ın mâlik olduğu sandalcı destgâhını vârislerinin Yoseb v. Sekyas’a sattığı Sandalcı aded 1 Hudâvendigâr-ı esbak cennet-mekân firdevs-âşiyân merhûm Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde tahrîr ü takrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen sandalcı esnâfı ustalarından bir aded destgâha mâlik olup işbu târih-i vesîkadan dokuz sene mukaddem mahmiye-i İstanbul’da Samatya kurbünde Mirâhor mahallesinde mütemekkin iken hâlik olan Yorgi v. İstefan nâm zimmînin verâseti zevce-i metrûkesi Anaştaşya bt. Andon nâm Nasrâniye ile hîn-i helâkinde sagīrler ve hâlâ kebîrler olan sulbî oğulları Angeli ve Kiryako zimmîlere ve kezâlik vakt-i helâkinde sagīre ve hâlâ kebîre olan sulbiye kızı Vasiliki Nasrâniyeye inhisârı tahakkukundan sonra şahısları ta‘rîf-i şer‘î ile mu‘arrefe olan mesfûretân Anaştaşya ve Vasiliki Nasrâniyeler ile mesfûrân Angeli ve Kiryako zimmîler meclis-i şer‘-i hatîr-i lâzımü’t-tevkīrde sandalcı ustalarından olup iki aded destgâha mâlik olan işbu bâ‘isü’s-sifr Yoseb v. Sekyas nâm zimmî muvâcehesinde her biri bi’l-verâse ikrâr-ı tam ve takrîr-i kelâm edip mûrisimiz hâlik-i mesfûrun ile’l-helâk yedinde mâlı ve mülkü ve ba‘de helâkihî bize mevrûs olmağla akd-i âtiyyü’z-zikrin sudûruna değin yedimizde mülk-i mevrûsumuz olan bir aded destgâhımızı bi’l-verâse tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mesfûr Yoseb zimmîye iki yüz guruşa bey‘ ve temlik ve teslîm eylediğimizde ol dahi ber-vech-i [muharrer] iştirâ ve temellük ve tesellüm ve kabz ü kabûl ve semeni olan meblağ-ı mezkûr iki yüz guruşu bize def‘ ü teslîm eylediğinde biz dahi yedinden bi’l-verâse tamamen ve kâmilen ahz ü kabz ve beynimizde iktisâm edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan bir aded destgâhda bizim bi’l-verâse kat‘a alâka ve medhalimiz kalmayup mersûm Yoseb zimmînin mâl-ı müşterâsı ve hakk-ı sırfı olmuşdur dediklerinde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 2 Receb sene 1238. Şühûdü’l-hâl: Eş-şâhidûne’s-sâbıkūn.