İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 244 Hüküm no: 216 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed İzzet Ağa b. Derviş Mustafa’nın un değirmenini Ahmed Ağa b. Hacı Mehmed’e sattığı Şehriyeci değirmen demekle arîf Mahmiye-i İstanbul’da Kapan-ı dakīk kurbünde İbnimeddâs mahallesinde sâkin uncu esnâfından Mehmed İzzet Ağa b. Derviş Mustafa nâm kimesne meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’l-kitâb Ahmed Ağa b. el-Hâc Mehmed mahzarında ikrâr-ı tam ve takrîr-i kelâm edip mahmiye-i mezbûrede Kapan-ı dakīk kurbünde arabacılar nâm mahâlde vâki‘ şehriyeci değirmeni demekle şehîr bir arsasının Arhandapula vakfına mukāta‘a-i kadîmesi olup üzerinde mevcûde bi’l-cümle ebniyesi mülk-i ma‘lûmü’l-hudûd ve üç horoslu bir bâb uncu değirmeni ebniye-i mezkûresinin nısfı müteveffâ Benli el-Hâc Mustafa veresesinin ve nısf-ı âharı ile zikr olunan üç horoslu bir bâb uncu değirmeni derûnunda mevcûde beyne’l-hıref gedik ta‘bîr olunur on iki bârgir ve sâir âlât-ı lâzıme-i ma‘lûme müstakıllen akd-i âti’z-zikrin sudûruna değin bâ-hüccet-i şer‘iye benim yedimde mâlım ve mülküm olmağın ben zikr olunan ebniye-i memlûkesinde ber-vech-i muharrer mâlik olduğum nısf hisse-i şâyi‘amın üç sehm i‘tibâriyle iki sehmini yedimde ibkā ve mâ‘adâ ancak bir sehmini iki yüz guruşa ve değirmen-i mezkûr derûnunda mevcûde müstakıllen yedimde mâlım olan gedik âlât-ı lâzıme-i merkūmesinden sekiz re’s bârgir ve onlara isâbet eden sâir âlât-ı lâzıme-i ma‘lûmeyi kezâlik yedimde ibkā ve mâ‘adâsı olan dört re’s bârgir ve onlara isâbet eden sâir âlât-ı lâzıme-i ma‘lûmeyi üç bin iki yüz guruş ki cem‘an üç bin dört yüz guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûr Ahmed Ağa’ya bey‘ ve temlik ve vech-i lâyıkları üzere teslîm eylediğimde ol dahi ber-vech-i muharrer yedimden iştirâ ve temellük ve tesellüm ve kabz ü kabûl ve semenleri olan meblağ-ı mecmû‘-ı merkūm üç bin dört yüz guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘ayn-i mezkûreynin tağrîr ve gabinlerine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan değirmen ebniye-i memlûkesinin nısfı ber-vech-i muharrer üç sehm i‘tibâriyle bir sehminde ve gerek âlât-ı lâzıme-i mezkûresinden dört re’s bârgir ve onlara isâbet eden sâir âlât-ı lâzıme-i mezkûrede benim kat‘a alâka ve medhalim kalmayup mezbûr Ahmed Ağa’nın mâlı ve mülkü ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 28 C sene 1238. Şühûdü’l-hâl: Uncular Kethudâsı el-Hâc Mehmed Ağa b. el-Hâc İbrahim, Abdullah Efendi b. Feyzullah, Ellialtı el-Hâc Mustafa Ağa b. Mehmed, Uncu Osman Ağa b. el-Hâc Abdulkadirzâde Ali, Na‘lbur el-Hâc Mustafa Ağa b. el-Hâc İbrahim.