İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 253 Hüküm no: 226 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. Seyyid Ahmed’in bakkal dükkânını Petro v. Ananya’ya sattığı Bakkāl Mahmiye-i İstanbul’da vâki‘ Bal Kapanı tüccârından es-Seyyid el-Hâc İsmail Ağa b. es-Seyyid Ahmed nâm kimesne meclis-i şer‘-i enverde yine mahmiye-i mezbûrede kâin bakkāl esnâfından işbu hâmilü’r-rakīm Petro v. Ananya nâm zimmî muvâcehesinde ikrâr-ı tam ve takrîr-i kelâm edip mahmiye-i mahkiyede Küçükpazar kurbünde Arabçeşmesi karşısında vâki‘ el-Hâc Mehmed Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharın ve mâ‘adâ altmış [sehim] hisse-i şâyi‘ası işbu yedinde olan bir kıt‘a hüccet-i şer‘iye hâmişinde tahrîr ve beyân olunduğu üzere akd-i âti’z-zikrin sudûruna değin benim yedimde mâlım ve mülküm olmağın ben âlât-ı lâzıme-i mezkûreden i‘tibâr-ı merkūm üzere mâlik olduğum altmış sehm hisse-i şâyi‘amın otuz sehmini işbu târih-i hüccet günü mersûm Petro zimmînin şerîki gāib ani’l-meclis Sava nâm zimmîye üç yüz guruş semen-i makbûza bey‘ etmemle bâkī otuz sehm hisse-i şâyi‘amı dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîklerim izin ve icâzetleri ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle üç yüz guruşa mersûm Petro zimmîye bey‘ ve temlik ve vech-i lâyıkı üzere teslîm eylediğimde ol dahi yedinden iştirâ ve temellük ve tesellüm ve kabz ü kabûl ve semeni olan meblağ-ı merkūm üç yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i ma‘lûmede benim kat‘a alâka ve medhalim kalmayup otuz sehm hisse-i şâyi‘a mersûm Petro zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 2 Receb sene [1]238. Şühûdü’l-hâl: Eş-şâhidûne’s-sâbıkūn.