İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 255 Hüküm no: 228 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiryako v. Yuvakim’in borcuna karşılık havyarcı bakkal dükkânını Hadice Hatun bt. Mehmed Said’e rehin bıraktığı Bakkāl idânesi Mahmiye-i İstanbul’da kâin havyarcı bakkāl tâifesinden Kiryako v. Yuvakim nâm zimmî meclis-i şer‘-i hatîr-i lâzımü’t-tevkīrde mahmiye-i mezbûrede odun çarşı kurbünde Bezzâz-ı cedîd mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-kitâb Hadice Hatun bt. Mehmed Said mahzarında ikrâr-ı tam ve takrîr-i kelâm edip mahmiye-i mezbûre hısnı ebvâbından Balık Pazarı Kapısı hâricinde vâki‘ Rali dükkânı demekle arîf ma‘lûmü’l-hudûd bir bâb havyarcı bakkāl dükkânı derûnunda beyne’l-esnâf gedik ta‘bîr olunur bir terâzî ma‘a derâhim ve bir kantar ve beş fıçı ve sâir âlât-ı lâzıme-i ma‘lûmeden yüz yirmi sehm i‘tibâriyle bâ-hüccet-i şer‘iye yedimde mâlım ve mülküm olan beş hisse-i şâyi‘amı mezbûre Hadice Hatun’a zikri âtî bana ikrâz edeceği meblağ mukābelesinde rehin vaz‘ ve vech-i lâyıkı üzere teslîm eylediğimde ol dahi yedimden irtihân ve tesellüm ve kabz ettikden sonra yine bana i‘âre ve teslîm ben dahi âriyeten ba‘de’l-kabz mezbûre Hadice Hatun mâlından bana iki bin guruş ikrâz ve teslîm ben dahi yedinden iktirâz ve kabz ve umûruma sarfla istihlâk edip meblağ-ı merkūm ile semenleri işbu târih-i kitâbdan iki sene tamamına değin müeccel ve mev‘ûd yine mezbûre Hadice Hatun’un malından ve yedinden iştirâ ve kabz eylediğim bir hilâlî sâ‘at ve bir bolyenli semmûr kürk semenlerinden dahi altı yüz guruş ki cem‘an iki bin altı yüz guruş zimmetimde mezbûre Hadice Hatun’a vâcibü’l-edâ deynim olup zikr olunan âlât-ı lâzıme-i ma‘lûmenin ber-i‘tibâr-ı mezkûr beş sehmi yedimde âriyetdir dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 28 C sene 1238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi, İlya v. Peredomoz, Çakıroğlu Yorgi v. Estavriyanos, Mihal v. Manoyil, Yazıcı Eftat v. Mavriyanos, Kābız-ı mâl Simyon v. Todori.