İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 256 Hüküm no: 229 Orijinal metin no: [53a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Usta b. Süleyman’ın iki adet çulha destgâhını Mehmed Emin Usta b. Mehmed’e sattığı Çulha Âsitâne-i aliyye -sânehallâhu te‘âlâ ani’l-âfât ve’l-beliyye-de vâki‘ bürüncük ve nesc i‘mâl eden çulha esnâfından Mehmed Emin Usta b. el-Hâc Süleyman nâm kimesne meclis-i şer‘-i hatîr-i lâzımü’t-tevkīrde yine esnâf-ı mezkûreden işbu bâ‘isü’l-kitâb Mehmed Emin Usta b. Mehmed nâm kimesne mahzarında ikrâr-ı tam ve takrîr-i kelâm edip esnâfımız yedlerinde mevcûde el-yevm mazmûnuyla amel oluna gelen bâlâsı tuğrâ-yı garrâ ile mu‘anven şurût-ı nizâmımızı hâvî bir kıt‘a fermân-ı âlî-şânda zikr ve beyân olunduğu üzere Âsitâne-i aliyyede cem‘an yüz seksen iki aded çulha destgâhı olup ziyâde ve noksân olmamak ve iki destgâh bir gedik i‘tibârı dahi mer‘î ve mu‘teber şurût-ı nizâmımızdan olmağla zikr olunan destgâhlardan mahmiye-i mahkiyede Çarşambapazarı kurbünde Mehmed Ağa Câmi‘-i şerîfi civârında kâin ma‘lûmü’l-hudûd bir bâb dükkân derûnunda mevcûde beyne’l-esnâf bir gedik ta‘bîr olunur bâ-hüccet-i şer‘iye yedimde mâlım ve mülküm olan iki aded mükemmel çulha destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Mehmed Emin Usta’ya altı yüz elli guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm altı yüz elli guruşu bana def‘ ü teslîm ben dahi yedinden ahz ü kabz edip mebî‘-i mezkûrun tağrîr ve gabnine [53b] müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan bir gedik ta‘bîr olunur iki aded destgâhda benim kat‘a alâka ve medhalim kalmayup merkūm Mehmed Emin Usta’nın mâl-ı müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 4 B sene 1238. Şühûdü’l-hâl: Kethudâ es-Seyyid Ahmed Ağa, diğer es-Seyyid Mehmed Emin Usta, Hasan Usta, es-Seyyid Mehmed Usta, Yiğitbaşı Hüseyin Usta.