İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 262 Hüküm no: 237 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Hasan’ın bakkal dükkânını Seyyid Numan Ağa b. Seyyid Ali’ye sattığı Bakkāl Hâlâ Mısr-ı Kāhire vâlîsi devletlü sa‘âdetlü atûfetlü Mehmed Ali Paşa hazretlerinin mahmiye-i İstanbul’da sâbıkā Ticâret vekîli olan el-Hâc İbrahim Ağa b. Hasan nâm kimesne meclis-i şer‘-i şerîf-i enverde işbu bâ‘isü’l-kitâb es-Seyyid Numan Ağa b. es-Seyyid Ali muvâcehesinde ikrâr-ı tam ve takrîr-i kelâm edip mahmiye-i İstanbul’da Koska nâm mahâlde boyacı dükkânı karşısında vâki‘ ma‘lûmü’l-hudûd Şeyh Mehmed Efendi dükkânı demekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye müstakıllen yedimde mâlım ve mülküm olan âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bât-ı sahîh-i şer‘î ve safka-i vâhide ile vekâlet-i mezkûrun mutasarrıfesi Zeyneb bt. Mehmed nâm Hatun’un sadrî kebîr oğlu ve tarafından vekîl-i şer‘îsi Mehmed Efendi b. eş-Şeyh el-Hâc Mehmed hâzır olduğu hâlde bakkālân pazarbaşısı ve bölükbaşısı ve bi’l-cümle nizâm ustaları ma‘rifetleriyle üç bin beş yüz guruşa mezbûr es-Seyyid Numan Ağa’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üçbin beş yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i ma‘lûme-i mezkûrede benim kat‘a alâka ve medhalim kalmayup merkūm es-Seyyid Numan Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 14 B sene 1238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi, Hüseyin Ağa b. Mustafa.