İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 262 Hüküm no: 236 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avratpazarlı İsmail Usta b. İbrahim’in paçacı esnafı kethudalığına tayini Paçacı esnâfına kethudâ nasbı Mahmiye-i İstanbul ve bilâd-ı selâse-i mu‘azzama ve tevâbi‘lerinde kâin bi’l-cümle paçacı esnâfının bir müddetden beri kethudâları olan el-Hâc Abdullah nâm kimesne kendi hâlinde olmayıp esnâf-ı mezkûrenin nizâm-ı kadîmlerine mugāyir harekette bulunmağla ihtilâl-i umûr-ı esnâfa bâdî olduğunu bi’l-ihbâr mütehakkık oldukda mezbûr el-Hâc Abdullah kethudâlık-ı merkūmdan azlolunmağla yerine esnâf-ı merkūme üzerlerine bir kethudâ nasbı lâzım ve mühim olmağın esnâf-ı mezkûrenin örf ve âdetlerine vâkıf ve nizâm-ı kadîmlerini arîf ve her vechile kethudâlık umûrunu idâre ve rü’yete kādir ve bi’l-cümle esnâfının mu‘temed ve muhtârları idüğü esnâf-ı merkūmeden Kasımpaşalı Mahmud Çavuş ve Balatlı Mehmed Emin Usta ve Avratpazarlı Mehmed Tâhir Usta ve Karagümrüklü Halil Usta ve Tahtakaleli Mehmed Sadık Usta ve Karaköylü Behzad Usta ve Karagümrüklü Hüseyin Usta ve Galatalı Zekeriya Usta ve Balatlı Abdülmümin Usta ve Avratpazarlı İbrahim Usta ve sâir ma‘lûmü’l-esâmî kimesneler haberleriyle zâhir ve mütehakkık olan yine esnâf-ı mekrûmeden işbu bâ‘isü’l-kitâb Avratpazarlı İsmail Usta b. İbrahim’i hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb -tûbâ-lehû ve hüsnü-meâb- efendi hazretleri hâlâ dergâh-ı âlî dâme mahfûfen bi’l-me‘âlî yeniçeri ağa[sı] sa‘âdetlü ağa hazretlerinin inzimâm-ı re’y ve ma‘rifetiyle esnâf-ı merkūme üzerlerine kethudâ nasb ü ta‘yîn ve nizâm-ı kadîmlerine mugāyir harekette bulunmamağa ve ihtilâl-i umûr-ı esnâfa bâdî ef‘âlden ictinâb edip esnâfından bir ferde hilâf-ı şer‘-i şerîf te‘addî ve rencîde etmemek üzere emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-vaka‘a bi’t-taleb ketb olundu. Fî 24 B sene 1238. Şühûdü’l-hâl: Orta yazıcılarından Esirci Mehmed Efendi, Mumcu Halil Ağa, Tütüncü Hüseyin Beşe, Muhzır Molla Hüseyin, Muhzır Molla Halil.