İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 265 Hüküm no: 240 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Payil v. Abraham’ın ibrişim bükücü dükkânını kardeşi İstefan’a sattığı İbrişim bükücü Hudâvendigâr-ı esbak cennet-mekân firdevs-âşiyân merhûm Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına << merbût şerîfe >> senevî bin iki yüz guruş rüsûmât ile mukayyed İstanbul’da Fazlıpaşa Sarayında vâki‘ ibrişim bükücü esnâfından Payil v. Abraham nâm zimmî meclis-i şer‘-i hatîr-i lâzımü’t-tevkīrde li-ebeveyn er karındaşı işbu bâ‘isü’r-rakīm İstefan nâm zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da mârrü’l-beyân Fazlıpaşa Sarayı derûnunda vâki‘ ibrişim bükücü destgâhlarından akd-i âti’z-zikrin sudûruna değin yedimde bâ-hüccet-i şer‘iye mâlım ve mülküm olan bir aded mükemmel ibrişim bükücü destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bin guruşa << bey‘ ve temlik >> karındaşım mesfûr İstefan zimmîye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl eylediğinden sonra semeni olan meblağ-ı merkūm bin guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt dahi etmemizle fîmâ-ba‘d zikr olunan bir aded destgâhda benim kat‘a alâka ve medhalim kalmayup karındaşım mesfûr İstefan zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 16 B sene 1238. Şühûdü’l-hâl: Kethudâ Abdüllatif Ağa, Molla Mahmud el-Muhzır, Yiğitbaşı Molla Mehmed.