İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 265 Hüküm no: 241 Orijinal metin no: [55a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Usta b. Osman’ın çulha destgâhı yarım hissesini Abdullah b. Osman’a sattığı Nısf destgâh-ı çulha Mahmiye-i İstanbul’da kâin çulha esnâfından Mehmed Usta b. Osman nâm kimesne meclis-i şer‘-i şerîf-i enverde esnâf-ı mezkûreden işbu bâ‘isü’l-kitâb Abdullah b. Osman nâm kimesne mahzarında ikrâr-ı tam ve takrîr-i kelâm edip mahmiye-i İstanbul’da Draman kurbünde Tercümanyunus mahallesinde vâki‘ şeyhülislâm-ı esbak merhûm Ömer Hulusi Efendi’nin binâ eylediği hanın civârında kâin ma‘lûmü’l-hudûd bir bâb dükkân derûnunda mevcûde beyne’l-esnâf bir gedik << ta‘bîr olunur >> i‘tibâr olunup akd-i âti’z-zikrin sudûruna değin yedimde mâlım ve mülküm olan âlât-ı lâzıme-i ma‘lûmenin bir destgâh [55b] nısf gediğini yedimde ibkā etmemle mâ‘adâ bir destgâh nısf gediği tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç yüz seksen guruşa merkūm Abdullah Usta’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç yüz seksen guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan bir aded destgâh nısf gedikte benim kat‘a alâka ve medhalim kalmayup merkūm Abdullah Usta’nın mâl-ı müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 14 B sene 1238. Şühûdü’l-hâl: Kethudâ es-Seyyid Ahmed Ağa, Yiğitbaşı Hüseyin Usta, diğer Hüseyin Usta.