İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 271 Hüküm no: 248 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Hüseyin’in arpa döğücü gediğini İbrahim Ağa b. Hüseyin’e sattığı Arpa ve döğücü gediği Mahmiye-i İstanbul hısnı ebvâbından Kapan-ı dakīk kapısı hâricinde kâin buğday döğücü esnâfından Bürüci Mehmed Ağa b. Hüseyin nâm kimesne meclis-i şer‘-i hatîr-i lâzımü’t-tevkīrde esnâf-ı mezkûreden işbu bâ‘isü’l-kitâb es-Seyyid el-Hâc İbrahim Ağa b. Hüseyin mahzarında ikrâr-ı tam ve takrîr-i kelâm edip mahmiye-i mezbûrede bâb-ı mezkûr hâricinde buğday döğücüler sûkunda cidâr-ı hısn ile yemenici dükkânı beynlerinde vâki‘ beş kepenkli ve bir kapılı bir bâb buğday ve arpa döğücü dükkânı derûnunda mevcûde beyne’l-esnâf gedik ta‘bîr olunur bir taş ve bir kile ve bir kantar ve bir terâzî ma‘a derâhim ve sâir döğücü âlât-ı lâzıme-i ma‘lûmesinin sekiz sehm i‘tibâriyle yedi sehmi âharın mâlı olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan bir sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîkim izniyle bin guruşa mezbûr es-Seyyid el-Hâc İbrahim Ağa’ya bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin guruşu bana def‘ ve teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan âlât-ı lâzıme-i mezkûrenin ber-i‘tibâr-ı merkūm bir sehminde benim kat‘a alâka ve medhalim kalmayup mezbûr es-Seyyid el-Hâc İbrahim Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 27 B sene 1238. Şühûdü’l-hâl: Kethudâ Mustafa Ağa, es-Seyyid Mustafa Ağa, Sultan Bâyezidli Hüseyin Ağa, Ali Usta, Süleyman Usta, Uzun İsmail Ağa, Yiğitbaşı Salih Ağa.