İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 270 Hüküm no: 247 Orijinal metin no: [56a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Edhem Ağa b. Ömer’in ibrişim bükücü destgâhını Halil Beşe b. Mehmed’e sattığı İbrişim bükücü Mahmiye-i İstanbul’da kâin ibrişim bükücü esnâfından İbrahim Edhem Ağa b. Ömer nâm kimesne meclis-i şer‘-i şerîf-i enverde esnâf-ı merkūme mülâzım kalfalarından işbu bâ‘isü’l-kitâb es-Seyyid Halil Beşe b. es-Seyyid Mehmed nâm kimesne mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan mahmiye-i mezbûrede Fazlıpaşa Sarayında vâki‘ esnâfımıza mahsûs bâ-fermân-ı âlî mu‘teber bir aded mükemmel ibrişim bükücü destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile beş yüz guruşa mezbûr es-Seyyid Halil Beşe’ye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ [-ı merkūm] beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan bir aded destgâhda benim kat‘a alâka ve medhalim kalmayup mezbûr es-Seyyid Halil Beşe’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 27 B sene 1238. Şühûdü’l-hâl: Kazzâz Kethudâsı Abdüllatif Ağa, Yiğitbaşı Molla Mehmed, Mehmed Usta ve gayruhum.