İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 272 Hüküm no: 250 Orijinal metin no: [56b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panço v. Dimitri’nin bakkal dükkânı gediğini Simyon v. Todori’ye sattığı Bakkāl Mahmiye-i İstanbul’da kâin kürkçü esnâfından Panço v. Dimitri nâm zimmî meclis-i şer‘-i hatîr-i lâzımü’t-tevkīrde yine mahmiye-i mezbûrede kâin bakkāl esnâfından işbu hâmilü’r-rakīm Simyon v. Todori zimmî muvâcehesinde ikrâr-ı tam ve takrîr-i kelâm edip mahmiye-i İstanbul hısnı ebvâbından Balat kapısı dâhilinde Dörtyolağzı’nda başeski kolluğu karşısında köşede vâki‘ Sarrâcbaşı dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi mersûm Simyon zimmînin yedinde mâlı ve mülkü olmağla mâ‘adâsı olup akd-i âti’z-zikrin sudûruna değin benim yedimde bâ-hüccet-i şer‘iye mâlım ve mülküm olan altmış sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûm Simyon zimmîye bin altı yüz elli guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin altı yüz elli guruşu bana def‘ ü teslîm eylediğinde ben dahi yedinden ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunan âlât-ı lâzıme-i ma‘lûmede benim kat‘a alâka ve medhalim kalmayup altmış sehmi mukaddemâ ve altmış sehmi hâlâ ber-minvâl-i muharrer şirâen ki mecmû‘ı mersûm Simyon zimmînin mâlı ve mülkü ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 29 B sene 1238. Şühûdü’l-hâl: Eş-şâhidûne’s-sâbıkūn.