İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 273 Hüküm no: 251 Orijinal metin no: [56b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Yani v. Eftimyos’nin abacı dükkânı gediğini Nikola v. Yuvan’a sattığı Husûs ile abacı gediği Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri içün cânib-i şerî‘at-ı garrâdan bi’l-iltimâs me’zûnen irsâl olunan Kâtib Mehmed Tâhir Efendi mahmiye-i İstanbul hısnı ebvâbından Ayazmakapısı hâricinde Kādı Hanı derûnunda tabaka-i ulyâda vâki‘ abacı esnâfına mahsûs lonca odasına varıp zeyl-i vesîkada muharrerü’l-esâmî kimesneler huzûrlarında akd-i meclis-i şer‘-i âlî ettikde mahrûse-i Galata’ya muzâfe kasaba-i Beşiktaş’ta Sinanpaşa mahallesinde mütemekkin esnâf-ı merkūmeden Kara Yani v. Eftimyos nâm zimmî tarafından bey‘-i câi’z-zikri ikrâr ve i‘tâ-i hüccete vekîl olduğu Ustabaşı Dimitri v. Yamandi ve Yorgi v. Dimitri [57a] nâm zimmîler şehâdetleriyle sâbit olan Abacı Aci Tağohari v. Yorgi nâm zimmî meclis-i ma‘kūd-ı mezkûrda esnâf-ı merkūmeden hâmilü hâze’r-rakīm Nikola v. Yuvan nâm zimmî muvâcehesinde bi’l-vekâle ikrâr-ı tam ve takrîr-i kelâm edip müvekkilim mesfûr Kara Yani zimmî mahmiye-i mezbûre hısnı ebvâbından Odunkapısı hâricinde tarafeyni berber ve yemenici dükkânları olan şehriye altı buçuk guruş kadîm kirâlı fevkınde iki bâb oda ve tahtında demir kapılı mağazayı müştemil mukayyed ve mu‘teber iki kepenk bir bâb abacı dükkânı derûnunda mevcûde beyne’l-esnâf gedik ta‘bîr olunur bir destgâh ve bir mikrâs ve bir endâze ve bir rezene ve bir kilim ve bir minder ve sâir âlât-ı lâzıme-i ma‘lûmenin yüz yirmi sehm i‘tibâriyle yirmi beş sehmi benim ve âhar yirmi beş sehmi mersûm Nikola zimmînin ve elli sehmi hâlik Mismârî Pavli v. Marat zimmî veresesinin ve yirmi sehmi Derzi Kostandi zimmînin iştirâken ve şâyi‘an bâ-hücec-i şer‘iye yedimizde emvâlimiz olmağla hâlâ ben dükkân-ı mezkûr derûnunda mevcûde gedik ta‘bîr olunur âlât-ı lâzıme-i mezkûreden ber-i‘tibâr-ı merkūm akd-i âti’z-zikrin sudûruna değin yedimde mâlım ve mülküm olan yirmi beş sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ bin elli guruşa mesfûr Nikola zimmîye bey‘ ve temlik ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı merkūm bin elli guruşu müşterî-i mersûm Nikola zimmî bana def‘ ü teslîm ben dahi yedinden tamamen ve kâmilen ahz ü kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i ma‘lûmenin ber-i‘tibâr-ı merkūm yirmi beş sehmi mukaddemâ ve yirmi beş sehmi hâlâ ber-minvâl-i muharrer şirâen ki cem‘an elli sehmi mersûm Nikola zimmînin emvâl-i müşterâtı ve hakk-ı sırfı olup benim kat‘a alâka ve medhalim kalmamışdır dedi dedikde gıbbe’’t-tasdîki’ş-şer‘î vâki‘ hâli kâtib-i merkūm mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 21 B sene 1238. Şühûdü’l-hâl: Kethudâ Mehmed Tâhir Efendi, Hafız Ali Ağa b. Abdülkerim, el-Hâc Osman Ağa b. Mehmed, Çukadâr es-Seyyid İsmail Ağa b. el-Hâc Ali, Ömer Çelebi b. Salih.