Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 338 Hüküm no: 371 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Ali Kaptan’ın bahçesini borcuna karşılık rehin verdiği Mahrûse-i Galata müzâfâtından kasaba-i Kasımpaşa’da Çatma Mescid mahallesinde sâkine Havva bt. Ali Kapudân nâm hâtun tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iyye ile ârifân olup mahalle-i mezbûre sükkânından Mustafa Çelebi b. Ali ve Mustafa Odabaşı b. Mahmud nâm kimesneler şehâdetleriyle şer‘an sâbit olan zevci Ali b. Abdullah nâm kimesne meclis-i şer‘-i şerîf-i enverde bâ‘isü hâze’l-kitâb Pehlivan el-Hâc Osman b. İbrahim mahzarında bi’l-vekâle ikrâr ve takrîr-i kelâm edip zevce-i müvekkile-i mezbûre Havva Hâtun’un mezbûr el-Hâc Osman’a târih-i kitâbdan yüz bir gün tamâmına değin müeccel ve mev‘ûd cihet-i deyn-i şer‘îden sekiz yüz esedî guruş deyni olmağla meblağ-ı mezbûr mukābelesinde yedinde mülk ve hakkı olup mahalle-i mezbûrede vâki‘ bir tarafdan Halil Kapudân veresesi mülkleri ve bir tarafdan mu‘allimhâne ve bir tarafdan Yahya Kethüdâ vakfı olan fırın ve bir tarafdan tarîk-i âm ile mahdûd eşcâr-ı müsmire ve gayr-ı müsmire mülk bahçesini cümle tevâbi‘ ve levâhıkı ile mezbûr el-Hâc Osman yedine rehin vaz‘ ve teslîm edip ol dahi ber vech-i muharrer irtihân ve kabz ve tesellüm eyledi dedikde gıbbe’t-tasdîki’ş-şer‘î vekîl-i mezbûr Ali meblağ-ı müeccel-i mezbûra tarafımdan emr ve kabûlü hâviye kefâlet-i sahîha-i şer‘iyye ile kefîl oldum dedikden sonra vekîl-i mezbûr Ali i‘âde-i kelâm edip meblağ-ı mezbûru müvekkilem mezbûre Havva Hâtun müddet-i mezkûrede mezbûr el-Hâc Osman’a edâdan âcize olursa zikr olunan bahçe-i mahdûde-i mezbûremi sûk-ı sultânîde semen-i misli ile âhara bey‘ ve kabz-ı semene ve semen-i mezbûrdan mezbûr el-Hâc Osman’a deyni olan meblağ-ı mezbûr sekiz yüz guruşu edâ ve teslîm ve bâkī kalan meblağ-ı fazlayı kendiye îsâle ve bunun mütevakkıf olduğu umûrun küllîsine tarafından işbu hâzır bi’l-meclis Mustafa Çelebi b. Ali nâm kimesneyi azl ve in‘izâlden masûne vekâlet-i devriyye ile vekîl ve nâib-i menâb nasb ve ta‘yîn eyledi dedikde ol dahi ber vech-i muharrer vekâlet-i mezbûreyi kabûl ve hizmet-i lâzımesin edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fî gurreti Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Efendi b. Yahya el-İmâm, Sinan Efendi b. Ali el-Müezzin, el-Hâc Mustafa b. Osman, Mustafa b. Mahmud, Mustafa b. Osman, Mustafa b. Süleyman.