İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 276 Hüküm no: 254 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Ahmed’in kuruyemişci dükkânı gediğini Hafız Osman Ağa b. Osman’a sattığı Kuruyemişci mübâya‘asıdır 7.500 guruşa Rumeli kassâmında asl-ı târih-i hüccet fî 4 C sene [12]38. Derûn-ı hüccetde ismi mezkûr Kuruyemişci İbrahim Ağa b. Ahmed meclis-i şer‘-i hatîr-i lâzımü’t-tevkīrde kezâlik derûn-ı hüccetde mezkûru’l-ism bâ‘isü’l-kitâb Kuruyemişci Hafız Osman Ağa b. Osman tarafından husûs-ı âti’l-beyânı tasdîka vekîl-i şer‘îsi es-Seyyid el-Hâc Ahmed Ağa b. Ali mahzarında ikrâr-ı tam ve takrîr-i kelâm edip derûn-ı hüccetde tahrîr ve beyân olunduğu üzere mahmiye-i İstanbul’da Zindân kapısı hâricinde balmumcular karşısında vâki‘ tarafeyni tarîk-i âm olan bir bâb kuruyemişci dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısfı müvekkil-i mezbûr Hafız Osman Ağa’nın ve nısf-ı âharı benim yedimizde iştirâken mâl-ı müşterâmız olmağın ben âlât-ı lâzıme-i merkūmeden akd-i âti’z-zikrin sudûruna değin yedimde mâlım ve mülküm olan nısf hissemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile yedi bin beş yüz guruşa müvekkil-i mezbûr Osman Ağa’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm yedi bin beş yüz guruşu bana def‘ ü teslîm ben dahi yedinden bi’t-tamam ve’l-kemâl ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup nısfı derûn-ı hüccetde tahrîr olunduğu üzere mukaddemâ ve nısf-ı âharı hâlâ ber-minvâl-i muharrer şirâen ki mecmû‘u müvekkil-i mezbûr Hafız Osman Ağa’nın mâl-ı müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 10 Ş sene 1238. Şühûdü’l-hâl: Kethudâ Mustafa Ağa b. Halil, Uzun Mehmed Ağa b. Hasan, el-Hâc Veliyüddin Ağa, İbrahim Ağa, Yiğitbaşı Mustafa Ağa.