İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 276 Hüküm no: 255 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kozma v. Atam’ın havyarcı bakkal dükkânı gediğini borcuna karşılık Şerife Hadice bt. Mehmed Said’a rehin bıraktığı Havyarcı bakkāl gediği rehni Mahmiye-i İstanbul’da kâin havyarcı bakkāl esnâfından Kozma v. Atam nâm zimmî meclis-i şer‘-i hatîr-i lâzımü’t-tevkīrde bâ‘isetü’l-kitâb Şerîfe Hadice bt. Mehmed Said’in sadrî kebîr oğlu tarafından husûs-ı âti’l-beyânda vekîl-i müseccel-i şer‘îsi es-Seyyid el-Hâc Ali b. Salih el-Arabî mahzarında ikrâr-ı tam ve takrîr-i kelâm edip mahmiye-i mezbûrede Balık Pazarı Kapısı hâricinde vâki‘ Moskov dükkânı demekle şehîr ma‘lûmü’l-hudûd bir bâb havyârcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeden yüz yirmi sehm i‘tibâriyle bâ-hüccet-i şer‘iye ancak benim yedimde mâlım ve mülküm olan dört buçuk sehm hisse-i şâyi‘amı vekîl-i mezbûr es-Seyyid el-Hâc Ali’nin zikri âtî bi’l-vekâle bana idâne edeceği meblağ mukābelesinde rehin vaz‘ ve vech-i lâyıkı üzere müvekkilesi mezbûre içün teslîm eylediğimde mezbûr es-Seyyid el-Hâc Ali dahi ber-vech-i muharrer bi’l-vekâle irtihân ve kabz ü kabûl ve yine bana i‘âre ve teslîm ben dahi ba‘de’l-kabz vâlidesi müvekkile-i mezbûrenin mâlından bi’l-vekâle bana bin guruş ikrâz ve teslîm ben dahi yedinden iktirâz ve kabz ve umûruma sarfla istihlâk edip meblağ-ı merkūm ile semeni işbu târih-i kitâbdan iki sene tamamına değin müeccel ve mev‘ûd yine müvekkile-i mezbûrenin mâlından vekîl-i mezbûr yedinden iştirâ ve kabz eylediğim bir hilâlî sâ‘at semeninden dahi üç yüz guruş ki cem‘an bin üç yüz guruş zimmetimde müvekkile-i mezbûre Şerîfe Hadice Hatun’a edâsı vâcib deynim olup âlât-ı lâzıme-i mezkûrenin i‘tibâr-ı merkūm üzere dört buçuk sehm hisse-i şâyi‘ası ber-vech-i muharrer yedimde âriyetdir dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 9 Ş sene 1238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi.