İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 286 Hüküm no: 267 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından Ağayi v. Yorgi’nin mâlik olduğu sandalcı destgâhını Kethuda Hacı Hafız Efendi çırağı Zotiri v. Kostandi’ye sattığı Sandalcı Hudâvendigâr-ı esbak cennet-mekân firdevs-âşiyân merhûm-ı mağfiret-nişân Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde tahrîr ü takrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen sandalcı esnâfından Ağayi v. Yorgi nâm zimmî meclis-i şer‘-i hatîr-i lâzımü’t-tevkīrde esnâf-ı merkūme mülâzım kalfalarından işbu hâmilü’r-rakīm Kethudâ Hacı Hafız Efendi çırağı Zotiri v. Kostandi nâm zimmî muvâcehesinde ikrâr-ı tam ve takrîr-i kelâm edip bâlâda zikr ve beyân olunan destgâhlardan akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan bir aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki yüz guruşa mersûm Zotiri zimmîye bey‘ ve temlik ve teslîm eylediğimde ol dahi ber-minvâl-i muharrer yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm iki yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan bir aded destgâhda benim kat‘a alâka ve medhalim kalmayup mersûm Zotiri zimmînin mâl-ı müşterâsı ve hakk-ı sırfı olmuşdur dedikde gıbbe’t-tasdîki’l-mer‘î mâ-vaka‘a bi’t-taleb ketb olundu. Fî 18 min-Ş sene 1238. Şühûdü’l-hâl: Kethudâ es-Seyyid el-Hâc Hafız Mehmed Emin Ağa, Yiğitbaşı Ebûbekir Ağa, Muhzır Molla Mahmud.