İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 286 Hüküm no: 266 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâbil v. Raban’ın mâlik olduğu bakkal dükkânı için kendisine hüccet verilmesi Yahûdî Bakkāl Âsitâne-i aliyye -sânehallâhu te‘âlâ ani’l-âfât ve’l-beliyyede kâin bakkāl esnâfının Yahûdî tâifesinden işbu hâmilü’r-rakīm Hâbil v. Raban nâm Yahûdî meclis-i şer‘-i şerîf-i enverde takrîr-i kelâm ve ta‘bîr ani’l-merâm edip mahmiye-i mezbûre hısnı ebvâbından Balatkapısı dâhilinde Senavi sokağında kâin Bayramoğlu dükkânı demekle şehîr ma‘lûmü’l-hudûd bir bâb Yahûdî bakkālı dükkânı derûnunda mevcûde yüz yirmi sehm i‘tibâr olunan beyne’l-esnâf gedik ta‘bîr olunur âlât-ı lâzıme-i ma‘lûme hasren vârisi olduğum bundan akdem hâlik olan babam mesfûr Raban Yahûdîden mevrûs mâlım ve mülküm olup lâkin ber-vech-i muharrer mülk-i mevrûsum olduğunu müş‘ir yedimde sened olmamağla takrîrim tahrîr ve erbâb-ı vukūftan istihbâr olunup sened olmak üzere kıbel-i şer‘den yedime hüccet i‘tâ olunmak matlûbumdur dedikde mukırr-ı mesfûrun bi’l-cümle takrîr-i meşrûhu vâkı‘a mutâbık idüğünü zeyl-i kitâbette muharrerü’l-esâmî kimesneler haber vermeleriyle mâ-vaka‘a bi’t-taleb ketb olundu. Fî 18 m [min] Ş sene 1238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi b. ( ), Döğenci v. Abraham zimmî, Yazıcı Eftat v. Mavriyanos zimmî, Kābız-ı mâl Simyon v. Todori zimmî, Yaşova v. Avram Yahûdî, Avram v. Salamon Yahûdî, Yako v. Mosi Yahûdî.