İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 288 Hüküm no: 269 Orijinal metin no: [60a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncuoğlu Yako v. Mosi’nin bakkal dükkânını kardeşi Sabuncuoğlu Avram v. Mosi’ye sattığı Yahûdî Bakkāl Âsitâne-i aliyye -lâ-zâlet mahfûzaten fi’l-himâyeti’r-Rabbâniye-de kâin bakkāl esnâfının Yahûdî tâifesinden Sabuncuoğlu Yako v. Mosi nâm Yahûdî meclis-i şer‘-i hatîr-i lâzımü’t-tevkīrde yine esnâf-ı merkūmeden karındaşı işbu bâ‘isü’s-sifr Sabuncuoğlu Avram v. el-mersûm Mosi nâm Yahûdî muvâcehesinde ikrâr-ı tam ve takrîr-i kelâm edip mahmiye-i mezbûre hısnı ebvâbından Balatkapısı hâricinde balıkçılar içinde vâki‘ Tavukçuoğlu dükkânı demekle şehîr ma‘lûmü’l-hudûd bir bâb Yahûdî bakkālı dükkânı derûnunda mevcûde yüz yirmi sehm i‘tibâr olunan beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet yedimde mâlım ve mülküm olan âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle beş yüz guruşa karındaşım mersûm Avram Yahûdî’ye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i ma‘lûme-i merkūmede benim kat‘a alâka ve medhalim kalmayup karındaşım mesfûr Avram Yahûdî’nin mâl-ı müşterâsı ve hakk-ı sırfı olmuşdur dedikde gıbbe’t-tasdîki’l-mu‘teber mâ-vaka‘a bi’t-taleb ketb olundu. Fî 18 min-Ş sene 1238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi b. ( ), Döğenci v. Abraham zimmî, Yazıcı Eftat v. Mavriyanos zimmî, Kābız-ı mâl Simyon v. Todori zimmî, Yaşova v. Avram Yahûdî, Avram v. Salamon Yahûdî, Hâbil v. Raban Yahûdî.