İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 289 Hüküm no: 270 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâbil v. Raban’ın mâlik olduğu bakkal dükkânını Yuda v. Salamon’a sattığı Yahûdî bakkāl Âsitâne-i aliyye -hamâhallâhu te‘âlâ ani’l-âfât ve’l-beliyye-de kâin bakkāl esnâfının Yahûdî tâifesinden Hâbil v. Raban nâm Yahûdî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Yuda v. Salamon nâm Yahûdî muvâcehesinde ikrâr-ı tam ve takrîr-i kelâm edip mahmiye-i mezbûre hısnı ebvâbından Balatkapısı dâhilinde Setavi? sokağında kâin Bayramoğlu dükkânı demekle şehîr ma‘lûmü’l-hudûd bir bâb Yahûdî bakkālı dükkânı derûnunda mevcûde yüz yirmi sehm i‘tibâr olunan beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye yedimde mâl-ı mevrûsum olan âlât-ı lâzıme-i ma‘lûmenin i‘tibâr-ı mezkûr üzere altmış sehmini yedimde ibkā mâ‘adâ altmış sehmini tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle beş yüz guruşa mesfûr Yuda Yahûdî’ye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan altmış sehmde benim kat‘a alâka ve medhalim kalmayup mesfûr Yuda Yahûdî’nin mâl-ı müşterâsı ve hakk-ı sırfı olmuşdur dedikde gıbbe’t-tasdîki’l-mu‘teber mâ-vaka‘a bi’t-taleb olundu. Fî 19 min-Ş sene 1238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi, Döğenci v. Abraham zimmî, Yazıcı Eftat v. Mariyanos zimmî, Kābız-ı mâl Simyon v. Todori zimmî, Yaşova v. Avram Yahûdî, Avram v. Salamon Yahûdî, Yako v. Mosi Yahûdî.