Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 339 Hüküm no: 373 Orijinal metin no: [59a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hatun bt. Mehmed’in Hasan Ağa b. Ali’den muhâlaa yoluyla boşanması Husûs-ı âti’l-beyânın mahallinde ketb u tahrîri iltimâs olunmağın kıbel-i şer‘den Mehmed Efendi b. İbrahim irsâl olunup ol dahi mahmiye-i İstanbul’da Yarhisarî Mustafa Efendi mahallesinde sâkine fahrü’l-muhadderât Ayşe Hâtun bt. Mehmed’in menziline varıp zeyl-i kitâbda muharrerü’l-esâmî olan udûl-i müslimîn huzûrunda akd-i meclis-i şer‘-i kavîm ettikde, mezbûre Ayşe Hâtun zâtını ma‘rifet-i şer‘iyye ile ârifân imâm Abdülbâkī Efendi b. Ahmed ve Müezzin Mehmed Halîfe b. Receb ta‘rîfleriyle mu‘arrefe oldukdan sonra meclis-i ma‘kūd-ı mezbûrda, zevc-i dâhili işbu bâ‘isü’l-vesîka Hasan Ağa b. Ali mahzarında ikrâr ve takrîr-i kelâm edip mezbûr Hasan Ağa zevcim olup beynimizde hüsn-i zindegânîmiz olmamağla zimmetinde mütekarrir ve ma‘kūdun-aleyh olan otuz bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Hasan Ağa ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl ettiğinden sonra hukūk-ı zevciyyete ve bi’l-vekâle târih-i kitâba gelince beynimizde cârî olan hukūk-ı ma‘lûme ve mechûleye müte‘allik cemî‘ da‘vâdan mezbûr Hasan Ağa’yı ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î vâki‘ hâli merkūm Mehmed Efendi mahallinde tahrîr edip ba‘dehû ma‘an irsâl olunan Mustafa b. Ahmed ve Mehmed b. Ali ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ali Çavuş b. Mehmed, İbrahim Beşe b. Mehmed, Ahmed b. Abdullah, Mustafa b. Ahmed ekmekçi, İsmail b. Abdullah.