İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 306 Hüküm no: 285 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolikoğlu Mikail v. Ohannes’in vârislerinin habbaz ve un ticaretinde şirket kurdukları Habbâzlık ve unculuk akd-i şirketi Mukābele şüd Medîne-i Üsküdar’a muzâfe Yoros nâhiyesine tâbi‘ Çengel karyesinde vâki‘ ma‘lûmü’l-hudûd bir bâb habbâz fırını ve ona merbût karye-i merkūmede kâin biri uncu ve beşi ekmekçi cem‘an altı horos yirmi dört re’s bârgir i‘tibâr olunan gedik ta‘bîr olunur âlât-ı lâzıme-i ma‘lûmenin altı re’s bârgir hissesine mâlik olan Kara Mağdis oğlu Sahak v. Abraham zimmî meclis-i şer‘-i şerîf-i enverde hâmiletü’r-rakīm dört re’s bârgir hissesine mâlik olan Harmanoğlu Agop ve iki re’s bârgir hissesine mâlik olan Kara Mağdis oğlu Mardıros ve İstepan zimmîler ile iki re’s bârgir hissesine mâlike olan Mağdis Ananya zimmî zevcesi Karyana bt. Vartos ve bir re’s bârgir hissesine mâlike olan Harospima bt. Nikagos v. Atam Nasrâniye taraflarından husûs-ı âtîde tasdîka vekîli olduğu mersûmetânın şahıslarını bilir Filibus v. Nikagos ve Dekiryos v. Kirkor zimmîler şehâdetleriyle sâbit olan mersûm Agop zimmînin babası Filibus v. Arakil ve beş re’s bârgir hissesine mâlike olan Margarita bt. İpsar v. Filibus Nasrâniye tarafından kezâlik husûs-ı âtîde vekîl olduğu şahsını bilir şâhidân-ı mersûmân şehâdetleriyle sâbit olan Arakil v. Parnik ve dört re’s bârgir hissesine mâlike olan Ana binti’l-hâlik Kolikoğlu Mikâil v. Ohannes Nasrâniyenin kaynı ve tarafından husûs-ı âtîde vekîl olduğu şahsını bilir şâhidân-ı mersûmân şehâdetleriyle sâbit olan Sarrâf Sakaoğlu dâmâdı Mardıros v. Bağdisyar zimmîler muvâcehelerinde habbâzân kethudâ ve bi’l-cümle nizâm ustaları hâzır oldukları hâlde ikrâr-ı tam ve takrîr-i kelâm edip ben mâlımdan yedi bin beş yüz guruş ve müvekkilûn-ı mersûmûndan mersûm Harmanoğlu Agop zimmî mâlından iki bin guruş ve mersûm Kara Mağdis oğlu Mardıros zimmî dahi mâlından iki yüz elli guruş ve mersûme Karyana Nasrâniye dahi [65b] mâlından dört bin guruş ve mersûme Harospima Nasrâniye dahi mâlından bin guruş ve mersûme Margarita Nasrâniye dahi mâlından iki bin beş yüz guruş ve mersûme Ana Nasrâniye dahi mâlından dört bin guruş ki cem‘an yirmi bir bin iki yüz elli guruş ikrâz ve birbirine halt edip beni kābız-ı mâl nasb ve ta‘yîn birle bana teslîm etmeleriyle bi-inâyetillâhi te‘âlâ hâsıla olan fâidenin otuz sehm i‘tibâriyle dokuz sehmini benim ve yedi sehmi mersûm Harmanoğlu Agop zimmînin ve iki sehmi Kara Makrisoğlu Mardıros zimmînin ve iki sehmi mersûme Karyana Nasrâniyenin ve bir sehmi mersûme Harospima Nasrâniyenin ve beş sehmi mersûme Margarita Nasrâniyenin ve dört sehmi mersûme Ana Nasrâniyenin ber-vech-i meşrûh beynimizde iktisâm olunmak üzere işbu târih-i kitâb günü habbâzlık ve unculuk ticâretinde akd-i şirket-i inân eyledik dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 Şa‘bân sene 1238. Şühûdü’l-hâl: Eş-şâhidûne’s-sâbıkūn.