İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 305 Hüküm no: 284 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolikoğlu Mikail’in vârislerinden Harospima bt. Nikagos Nasrâniye’nin bir re’s bargir hisseye sahip olduğu Habbâz fırını tasadduku Mukābele şüd Medîne-i Üsküdar’a muzâfe Yoros nâhiyesine tâbi‘ Çengel karyesinde vâki‘ ma‘lûmü’l-hudûd bir bâb habbâz fırını ve ona merbût karye-i merkūmede kâin biri uncu ve beşi ekmekçi cem‘an altı horos yirmi dört re’s bârgir i‘tibâr olunan gedik ta‘bîr olunur âlât-ı lâzıme-i ma‘lûmenin altı re’s bârgir hissesine mâlik olan Kara Mağdis oğlu Sahak v. Abraham zimmî kendi nefsinden asâleten ve iki re’s bârgir hissesine mâlik olan ammi oğlu Mardıros v. İstepan zimmî tarafından husûs-ı âtîde vekîl olduğu bu esnâda Âsitâne-i aliyye’ye gelen Filibus v. Nikagos ve Dekiryos v. Kirkor zimmîler şehâdetleriyle ber-nehc-i şer‘î sâbit olmağla vekâleten dört re’s bârgir hissesine mâlik olan Harmanoğlu Agop zimmî ile iki re’s bârgir hissesine mâlike olan Mağdis Ananya zimmî zevcesi Karyana bt. Vartos Nasrâniye taraflarından kezâlik husûs-ı âtîde vekîl olduğu Nasrâniye-i mersûmenin şahsını bilir şâhidân-ı mersûmân şehâdetleriyle ber-nehc-i şer‘î sâbit olan mersûm Agop zimmînin babası Filibus v. Arakil ve dört re’s bârgir hissesine mâlike olan Ana bt. Kolikoğlu Mikâil v. Ohannes Nasrâniyenin kaynı ve tarafından kezâlik husûs-ı âtîde vekîli olduğu şahsını ârifân şâhidân-ı mersûmân şehâdetleriyle sâbit olan [65a] Sarrâf Sakaoğlu dâmâdı Mardıros v. Bağdisyar zimmîler meclis-i şer‘-i hatîr-i lâzımü’t-tevkīrde beş re’s bârgir hissesine mâlike olan Margarita bt. İpsar v. Filibus Nasrâniye tarafından kezâlik husûs-ı âtîde vekîl olduğu şahsını bilir şâhidân-ı mersûmân şehâdetleriyle sâbit olan Arakil v. Parnik zimmî hâzır olduğu hâlde bir re’s bârgir hissesine mâlike olan hâmiletü’r-rakīm mersûm Kolikoğlu Mikâil nâm hâlikin zevcesi Harospima bt. Nikagos Nasrâniye tarafından kezâlik husûs-ı âtîde tasdîka vekîl olduğu şahsını ârifân şâhidân-ı mersûmân şehâdetleriyle sâbit olan Markar oğlu Kirkor v. Mardıros zimmî muvâcehesinde habbâzân kethudâsı ve bi’l-cümle nizâm ustaları kezâlik hâzır oldukları hâlde her biri bi’l-asâle ve bi’l-vekâle ikrâr-ı tam ve takrîr-i kelâm edip bâlâda tafsîl ve beyân olunduğu üzere fırın ve değirmen-i mezkûrun ber-i‘tibâr-ı merkūm bir re’s altı mıh bârgir hissesi mukaddemâ müvekkile-i mersûme Harospima Nasrâniye’nin zevci hâlik-i mersûmdan mevrûs yedinde mülkü iken bundan akdemce altı mıh bârgir hissesini oğlunun evlâdı olup müvekkile-i mersûme Margarita Nasrâniyenin sadrî evlâdı olan Nikagos ve Tatos ve Manas ve Penbe ve diğer Harospima nâm beş nefer sıgāra bâ-hüccet ba‘de’l-bey‘ sıgār-ı mersûmûnun anaları ve vasîleri mersûme Margarita Nasrâniye dahi bi’l-vesâye sıgār-ı mesfûrûnun cem‘an beş re’s bârgir hisselerini bâ-hüccet âhara bey‘ ve ba‘dehû âhardan kendi nefsi içün iştirâ ve kabz edip ol-vechile âlât-ı lâzıme-i ma‘lûme-i mezkûrenin el-yevm bir re’s bârgir hissesi müvekkile-i mersûme Harospima Nasrâniye’nin bi’l-irsi’ş-şer‘î mülkü olup bizim ve müvekkilûn-ı mersûmûnun bir re’s bârgir hissesinde kat‘a alâka ve medhalimiz yokdur dediklerinde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 25 Receb sene 1238. Şühûdü’l-hâl: Eş-şâhidûne’s-sâbıkūn.