İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 308 Hüküm no: 287 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından Burunsuz Abdalah v. Marin’in mâlik olduğu sandalcı destgâhını Refayil v. Eremya’ya sattığı Sandalcı mübâya‘ası, destgâh 2, guruş 400 Hudâvendigâr-ı esbak cennet-mekân firdevs-âşiyân merhûm ve mağfiret-nişân Sultan Selim Han -tâbe serâhû- hazretlerinin medîne-i Üsküdar’da vâki‘ binâ ve ihyâsına muvaffak oldukları Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde takrîr ü tahrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen sandalcı esnâfından Burunsuz Abdalah v. Marin nâm zimmî meclis-i şer‘-i hatîr-i lâzımü’t-tevkīrde yine esnâf-ı mezkûreden olup üç aded destgâha mâlik olan işbu hâmilü’r-rakīm Refayil v. Eremya nâm zimmî muvâcehesinde ikrâr-ı tam ve takrîr-i kelâm edip bâlâda zikr olunan destgâhlardan akd-i âti’z-zikrin sudûruna değin iki kıt‘a hüccet-i şer‘iye ile mâlik olduğum beş aded destgâhımın üç adedini yedimde ibkā etmemle mâ‘adâ iki aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile dört yüz guruşa mesfûr Refayil zimmîye bey‘ ve temlik ve teslîm eylediğimde ol dahi yedimden [66a] iştirâ ve temellük ve tesellüm ve kabz ü kabûl ve semeni olan meblağ-ı merkūm dört yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan iki aded destgâhda benim alâka ve medhalim kalmayup mersûm Refayil zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 12 N sene [1]238. Şühûdü’l-hâl: Eş-şâhidûne’s-sâbıkūn.