İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 309 Hüküm no: 288 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstirati v. Nikola’nın vârisleri Mogala bt. Anaştaş ve İlya’ya sahip oldukları sandalcı destgâhları için hüccet verilmesi Sandalcı, destgâh 2 Hudâvendigâr-ı esbak cennet-mekân firdevs-âşiyân merhûm ve mağfiret-nişân Sultan Selim Han -tâbe serâhû- hazretlerinin medîne-i Üsküdar’da binâ ve ihyâsına muvaffak oldukları Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde takrîr ü tahrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olmağla sandalcı esnâfından zikr olunan destgâhlardan bir aded destgâha mâlik [ve] bundan akdem hâlik olan İstirati v. Nikola nâm zimmînin verâseti zevce-i metrûkesi Mogala bt. Anaştaş Nasrâniye ile sulbî kebîr oğlu esnâf-ı merkūmeden İlya zimmîye münhasıra ve tashîh-i meselesi sekiz sehmden olup sihâm-ı mezbûrenin bir sehmi zevcesi mersûmeye ve bâkī yedi sehmi oğlu mersûm İlya zimmîye isâbeti tahakkukundan sonra kendi nefsinden asıl ve anası mersûme Mogala Nasrâniye tarafından husûs-ı âtiyyü’l-beyânda vekîl-i şer‘îsi mersûm İlya zimmî meclis-i şer‘-i hatîr-i lâzımü’t-tevkīrde bi’l-verâse ve bi’l-vekâle ikrâr-ı tam ve takrîr-i kelâm ve ta‘bîr ani’l-merâm edip esnâfımızın mâlik oldukları zikr olunan destgâhlardan bir aded destgâh babam hâlik-i mesfûr İstirati zimmînin ile’l-helâk bâ-hüccet-i şer‘iye yedinde mâlı ve mülkü ve ba‘de helâkihî ber-tashîh-i merkūm zevcesi anam müvekkile-i mersûme Mogala Nasrâniye ile bana mevrûs olup lâkin zikr olunan destgâh anam mersûme ile benim ber-vech-i muharrer mâl-ı mevrûsum olduğunu hâvî yedimizde sened olmamağla takrîr ve tahrîr ve erbâb-ı vukūftan istihbâr olunup sened olmak üzere kıbel-i şer‘den yedimize bir kıt‘a hüccet i‘tâ olunmak bi’’l-verâse ve bi’l-vekâle matlûbumdur dedikde mesfûr İlya zimmînin bi’l-cümle takrîr-i meşrûhu vâkı‘a mutâbık ve zikr olunan bir aded destgâh anası mersûme ile ber-tashîh-i merkūm mâl-ı mevrûsları idüğünü zeyl-i kitâbda muharrerü’l-esâmî Müslimîn alâ-tarîki’ş-şehâde haber vermeleriyle mâ-vaka‘a [bi’t-taleb ketb olundu.] Fî 8 N sene [1]238. Şühûdü’l-hâl: Eş-şâhidûne’s-sâbıkūn.