İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 310 Hüküm no: 290 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Esad Efendi b. Seyyid Mustafa Efendi ile eşi Şerife Şefika Hanım’ın menzillerini Seyyid Mehmed Arif Efendi’ye sattıkları Menzil mübâya‘ası 5.000 guruş Husûs-ı âti’l-beyânı mahâllinde ketb ü tahrîr içün savb-ı şer‘-i enverden me’zûnen mürsel Kâtib Abdullah Efendi mahmiye-i İstanbul’da Peykhâne kurbünde Dizdâriye mahallesinde vâki‘ hâlâ başmuhâsebe kalemi Kîsedârı umdetü erbâbi’t-tahrîr ve’l-kalem es-Seyyid Mehmed Ârif Efendi’nin konağına varıp zeyl-i sahîfede muharrerü’l-esâmî Müslimîn huzûrlarında akd-i meclis-i şer‘-i âlî eyledikde ekâbir-i ricâl-i Devlet-i aliyye’den hâlâ Defterdâr-ı Şıkk-ı evvel umdetü’l-e‘âlî ve’l-e‘âzım sa‘âdetlü atûfetlü es-Seyyid Mehmed Esad Efendi b. el-merhûm es-Seyyid Mustafa Efendi ile halîle-i muhteremeleri umdetü’l-muhadderât Şerîfe Şefika Hanım bt. Mustafa Efendi taraflarından husûs-ı âti’l-beyânı ikrâr ve i‘tâ-i hüccete vekîlleri olduğu zâtı mûmâ-ileyhâyı mu‘arrefe-i şer‘iye ile ârifân İbrahim Ağa b. Ahmed ve Ahmed Ağa b. Mehmed nâm kimesneler şehâdetleriyle ber-nehc-i şer‘î sâbit olan Murad Paşa Câmi‘-i şerîfi Hatîbi İbrahim Efendi b. Ahmed nâm kimesne meclis-i ma‘kūd-ı mezkûrda sâhib-i hâze’l-kitâb mûmâ-ileyh es-Seyyid Mehmed Ârif Efendi b. es-Seyyid Mehmed Efendi mahzarında bi’l-vekâle ikrâr-ı tam ve takrîr-i kelâm edip müvekkillerim mûmâ-ileyhâ es-Seyyid Mehmed Esad Efendi ve Şerîfe Âişe Şefika Hanım mahmiye-i İstanbul’da Şehzâde Sultan Mehmed Câmi‘-i şerîfi kurbünde Hoşkadem Mahallesinde vâki‘ bir tarafdan elli altı bölük ustalığından çerâğ olan Mustafa Ağa menzili ve iki tarafdan müteveffâ berberbaşı-i esbak Silahşorân-ı Hazret-i şehriyârîden Mehmed Ağa b. Abdullah’ın hayatında taht-ı tasarrufunda olan arsa-i hâliye ve bir tarafdan tarîk-i âm ile mahdûd hâriciyede ulyâsında iki bâb oda ve bir sofa ve bir memşâ ve vustâsında iki bâb oda ve bir sofa ve bir memşâ ve süflâsında bir koğuş ve bir ahır ve dâhiliye-i ulyâsında üç bâb oda ve iki sofa ve iki memşâ ve vustâsında üç bâb oda ve bir sofa ve iki memşâ ve süflasında bir bâb oda ve matbah ve mahtab ve kömürlük ve bir memşâ ve bir hamam ve bir câmekân ve bir su hazînesini müştemil arsası Ahmed Bey b. Mustafa Paşa Vakfına senevî dokuz guruş sekiz para icâre-i müecceleli vakıf olup mâ‘adâ üzerine olan bi’l-cümle ebniyesi akd-i âti’z-zikrin sudûruna değin bâ-hüccet-i şer‘iye iştirâken yedimizde mâlımız ve mülkümüz olmağla biz ber-minvâl-i meşrûh iştirâken mâlikler olduğumuz ebniye-i memlûke-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mûmâ-ileyh es-Seyyid Mehmed Ârif Efendi’ye beş bin guruşa bey‘ ve temlik ve teslîm eylediğimizde ol dahi yedimizden ber-vech-i mübeyyen iştirâ ve temellük ve tesellüm ve kabz ü kabûl ve semeni olan meblağ-ı merkūm beş bin guruşu mûmâ-ileyh es-Seyyid Mehmed Ârif Efendi bize tamamen def‘ ü teslîm eylediğinde biz dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ve iskāt-ı tamm-ı sarîh-i mer‘î ile kabûlü hâvî ibrâ ve iskāt dahi etmemizle fîmâ-ba‘d sâlifü’l-beyân menzil-i mahdûd-ı mezkûrun ebniye-i memlûke-i merkūmesinde bizim kat‘a alâka ve medhalimiz kalmayup mûmâ-ileyh es-Seyyid Mehmed Ârif Efendi’nin mülk-i müşterâsı ve hakk-ı sırfı olmuşdur dediler dedikde gıbbe’t-tasdîki’ş-şer‘î vâki‘ hâli kâtib-i mezbûr mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 16 N sene [1]238. Şühûdü’l-hâl: Başmuhâsebe kalemi kâtiblerinden Süleyman Efendi, Ali Efendi, Mehmed İzzet Efendi, Mehmed Emin Efendi, İbrahim Ağa b. Ahmed ve gayruhum. [66b-2] <<Âsitâne-i aliyyede ve bilâd-ı selâsede kâin Moralı Rum tâifesi havenesinin üzerlerinde olan bakkāl ve yağcı dekâkin ve mahzenleri gediklerinin cânib-i mîrîden füruht olunmak üzere müzâyede kāimeleri ihrâc ettirilerek cânib-i mîrîden müzâyede olundukda takdîm eyledikleri defteri mantûkunca karâr eden mu‘accelâtı bir yük elli dokuz bin dokuz yüz on guruş ve zimemleri kırk bin doksan guruş ki cem‘an iki yüz bin guruşa bâliğ ve havene-i mersûmunda tüccârın ve ber-vech-i tahmîn müstemen tâifesinin matlûbları iki yük yirmi altı bin iki yüz kırk dört guruşa resîde olup havene-i mesfûrûnun dekâkin ve mağaza gedikleri mu‘accelatıyla zimemleri olan meblağ-ı mecmû‘-ı mezkûr iki yüz bin guruş tüccâr ve sâirînin matlûbları olan mebâliğden fürû-nihâde ile lede’l-müvâzene tüccâr ve müstemenin yirmi altı bin iki yüz kırk dört guruş ziyâde alacakları olduğu nümâyân idüğü ve Âsitâne-i aliyye’de Bal Kapanı ve Galata Yağ Kapanı tüccârı ve revgan-ı zeyt >>. [67a Boş] [Beyaz] [beyaz]