İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 312 Hüküm no: 291 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Süleyman’ın menzilini Kara Feyzullah oğlu Ahmed b. Veliyüddin’e sattığı Anadolu’da menzil mübâya‘asıdır. Fi’l-asl vilâyet-i Anadolu’da Kastamonu sancağında Taşköprü kazâsı mahallâtından Câmi‘-i kebîr mahallesi ahâlisinden olup mahmiye-i İstanbul’da Çarşamba kurbünde Beyceğiz mahallesinde mütevattınen sâkin teba‘adan Hüseyin Ağa b. Süleyman nâm kimesne meclis-i şer‘-i şerîf-i enverde kaza-i mezkûr ahâlilerinden iş bu bâ‘isü’l-vesîka Kara Feyzullah oğlu Ahmed b. Veliyüddin nâm kimesne mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye müstakıllen yedimde mülk ve hakkım olup zikr olunan Câmi‘-i kebîr mahallesinde kâin bir tarafdan Ahmed Çelebioğlu menzili bahçesi ve bir tarafdan Süleyman Molla menzili ve iki tarafdan tarîk-i âm ile mahdûd ma‘lûmü’l-müştemilât bir bâb mülk menzilimi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile mezbûr Ahmed’e yedi yüz guruşa bey‘ ve temlik ve mahâllinde kabz ü taslît eylediğimde ol dahi ber-vech-i muharrer iştirâ ve temellük ve tasallut ve kabûl eyledikden sonra semeni olan meblağ-ı mezkûr yedi yüz guruşu müşterî-i mezbûr Ahmed bana def‘ ü teslîm eylediğinde ben dahi yedinden tamamen tesellüm ve ahz ü kabz eyledim fîmâ-ba‘d menzil-i mahdûd-ı mezkûrda benim aslâ ve kat‘a alâka ve medhalim kalmayup mezbûr Ahmed’in mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 24 N sene 1238. Şühûdü’l-hâl: Kethudâ-yı muhzırân İsmail Ağa, Muhzır Ahmed Çelebi, Süleyman Ağa b. Mehmed, Abdullah Beşe b. Ali ve gayruhum.