İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 325 Hüküm no: 308 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serope v. Karabet’in kuyumcu dükkânı gediğini Salamon v. Tavit’e sattığı Mübâya‘a-i kuyumcu Mahmiye-i İstanbul’da kâin kuyumcu esnâfından Serope v. Karabet nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Salamon v. Tavit nâm Yahûdî muvâcehesinde ikrâr-ı tam ve takrîr-i kelâm edip mahmiye-i mezbûrede kuyumcular sûkunda bezzâzistân-ı atik kuyumcular kapısı karşısında vâki‘ Ağa zukağının sağ tarafından addolundukda ikişer gedikli on iki dükkân tekmîlinde on üçüncü bir gedikli dükkâna muttasıl dördüncü iki gedikli ve şehriye dört guruş kadîm kirâlı bir bâb kuyumcu dükkânı derûnunda mevcûde beyne’l-esnâf iki gedik ta‘bîr olunur akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mesfûr Salamon Yahûdî’ye üç bin guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan iki gedik ta‘bîr olunur kuyumcu âlâtında benim kat‘a alâka ve medhalim kalmayup mesfûr Salamon Yahûdînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 5 Ramazan sene 1238. Şühûdü’l-hâl: Eş-şâhidûne’s-sâbıkūn.