İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 325 Hüküm no: 307 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kigork v. Tavit’in kuyumcu dükkânı gediğini Panos v. Kiragos’a sattığı Kuyumcu mübâya‘ası Mahmiye-i İstanbul’da kâin kuyumcu esnâfından Kigork v. Tavit nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Panos v. Kiragos nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede kuyumcular içinde vâki‘ Uncuoğlu sokağının bezzâzistan cânibi sol tarafı başından addolundukda derûnunda iki gedik i‘tibâr olunan şehriye kırk dört para kadîm kirâlı yedinci bir bâb kuyumcu dükkânı derûnunda mevcûde beyne’l-hıref gedik ta‘bîr olunur akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan âlât-ı lâzıme-i ma‘lûmelerimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki bin guruşa mesfûr Panos zimmîye bey‘ ü temlik ve teslîm eylediğinde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika [âmme-i] da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan dükkân derûnunda mevcûde gedik ta‘bîr olunan âlât-ı lâzımelerde benim kat‘a alâkam kalmayup mesfûr Panos zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 4 Ramazan sene 1238. Şühûdü’l-hâl: Eş-şâhidûne’s-sâbıkūn.