İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 327 Hüküm no: 310 Orijinal metin no: [71b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çekiçoğlu Andon v. Serkiz’in kuyumcu dükkânı gediğini Serope v. Karabet’e sattığı Mübâya‘a-i kuyumcu Mahmiye-i İstanbul’da kâin kuyumcu esnâfından Çekiçoğlu Andon v. Serkiz nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Serope v. Karabet nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede kuyumcular sûkunda bezzâzistân-ı atik kuyumcular kapısı karşısında vâki‘ Ağa zukağının sağ tarafından addolundukda ikişer gedikli on iki dükkân tekmîlinde on üçüncü bir gedikli dükkâna muttasıl on dördüncü iki gedikli ve şehriye dört guruş kadîm kirâlı bir bâb kuyumcu dükkânı derûnunda mevcûde beyne’l-esnâf iki gedik ta‘bîr olunur akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan âlât-ı lâzımemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç bin guruşa mesfûr Serope zimmîye bey‘ ü temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin guruşu bana def‘ ve teslîm ben dahi yedinden tamamen ahz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle ba‘de’l-yevm zikr olunan iki gedik ta‘bîr olunur kuyumcu âlâtında benim kat‘a alâkam kalmayup Serope zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 4 Ramazan sene 1238. Şühûdü’l-hâl: Eş-şâhidûne’s-sâbıkūn.