İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 327 Hüküm no: 311 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohannes v. Manuk’un kuyumcu dükkânı gediğini Gürcüoğlu Anparsum v. Kapril’e sattığı Mübâya‘a-i kuyumcu Mahmiye-i İstanbul’da Kumkapı kurbünde Nişâncı İbrahim Paşa mahallesinde mütemekkin kuyumcu esnâfından Ohannes v. Manuk nâm zimmî meclis-i şer‘-i şerîf-i enverde yine esnâf-ı merkūmeden işbu hâmilü’r-rakīm Gürcüoğlu Anparsum v. Kapril nâm zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da Çarşı-yı Kebîr’de kuyumcular içinde vâki‘ Ağa zukağının bezzâzistân-ı atik tarafı başından addolundukda derûnunda iki gedik i‘tibâr olunan dördüncü şehriye yüz para kadîm kirâlı bir bâb kuyumcu dükkânı derûnunda mevcûde beyne’l-hıref ikinci gedik ta‘bîr olunur akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mesfûr Anparsum zimmîye dört bin iki yüz elli guruşa bey‘ ve temlik eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı mezkûr dört bin iki yüz elli guruşu bana def‘ ü teslîm ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan dükkân derûnunda mevcûde gedik ta‘bîr olunur âlât-ı lâzımede benim kat‘a alâka ve medhalim kalmayup mesfûr Anparsum zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 4 Ramazan sene 1238. Şühûdü’l-hâl: Eş-şâhidûne’s-sâbıkūn.