İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 332 Hüküm no: 317 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Yorgi’nin bakkal dükkânı gediğini Pavli v. Kiryako’ya sattığı Bakkāl Kaydı ihrâc şüd fî 25 Safer sene [1]285. Kaydı ihrâc şüd fî 28 Ca sene 1330. Hayri Kaydı ihrâc şüd fî 18 Şa‘bân sene [1]331. Hayri Mahmiye-i İstanbul’da kâin bakkāl esnâfından Kostantin v. Yorgi nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Pavli v. Kiryako nâm zimmî muvâcehesinde ikrâr-ı tam ve takrîr-i kelâm edip mahmiye-i merkūmede Küçükmustafapaşa’da Gül Câmi‘-i şerîfi mahallesinde vâki‘ Tatar Ağası dükkânı demekle meşhûr ma‘lûmü’l-hudûd bir bâb bakkāl dükkânı ile civârında kâin kapalı bir bâb dükkân derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin her biri yüz yirmişer sehm i‘tibâriyle doksan sehmi âharın mâlı olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye benim mâlım ve mülküm olan her birinden otuz sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîk-i âharın izin ve icâzeti ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle bin iki yüz guruşa mesfûr Pavli zimmîye bey‘ ve temlik ve vech-i lâyıkı üzere teslîm ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin iki yüz guruşu bana def‘ ü teslîm ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikirleri mürûr eden iki bakkāl dükkânları derûnlarında mevcûde gedik ta‘bîr olunur âlât-ı lâzıme-i mezkûrelerde benim her birinin i‘tibâr-ı mezkûr üzere otuzar sehm-i şâyi‘ında benim kat‘a alâka ve medhalim kalmayup mesfûr Pavli zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 19 Ramazan sene 1238. Şühûdü’l-hâl: Eş-şâhidûne’s-sâbıkūn.