İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 331 Hüküm no: 316 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manol v. Kostantin’in bakkal dükkânı gediğini Nikola v. Petro’ya sattığı Bakkāl Mahmiye-i İstanbul’da kâin bakkāl esnâfından Manol v. Kostantin nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Nikola v. Petro nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Samatya kurbünde Ağahamamı civârında vâki‘ Ali Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi işbu hâzır bi’l-meclis Petro v. Kostandi nâm zimmînin yedinde mâlı olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan altmış sehm hisse-i şâyi‘anın otuz sehmini işbu târih-i hüccet günü diğer hâzır bi’l-meclis Ağayi v. Esbir zimmîye bâ-hüccet-i şer‘iye semen-i ma‘lûm ve makbûza bey‘ ve temlik etmemle bâkī otuz sehmini dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile hâzır-ı mesfûr Petro zimmînin izin ve icâzeti ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle beş yüz yirmi beş guruşa mesfûr Nikola zimmîye bey‘ ü teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm beş yüz yirmi beş guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i mezkûrede benim kat‘a alâka ve medhalim kalmayup otuz sehm hisse-i şâyi‘ası mersûm Nikola zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 12 Ramazan sene 1238. Şühûdü’l-hâl: Pazarbaşı Süleyman Ağa, Kâtib Ahmed Efendi, Çakıroğlu Aci Yorgi, Kābız-ı mâl Eftat zimmî ve gayruhum.