İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 334 Hüküm no: 319 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yüzbir Mustafa Ağa b. Hüseyin’in vefat eden Osman Odabaşı’nın yerine hallâc esnafı kethudalığına tayini Hallâc esnâfının kethudâ nasbı Âsitâne-i aliyyede kâin hallâc esnâfının kethudâları olan Osman Odabaşı nâm kimesne vefât etmekle yerine esnâf-ı mezkûre üzerlerine bir kethudâ nasbı lâzım ve mühim emânet ile ma‘rûf ve istikāmet ile mevsûf ve örf ve âdetlerine vâkıf ve nizâmlarını arîf ve her vechile kethudâlık umûrunu rü’yete kādir ve cümlesinin merzî ve muhtârları idüğü esnâf-ı merkūmeden es-Seyyid el-Hâc Ali Ağa b. İbrahim ve Mustafa Ağa b. Receb ve Ahmed Ağa b. el-Hâc Hüseyin ve Yazıcı Mehmed Emin Ağa b. Hüseyin ve Yusuf Usta b. İbrahim nâm Müslimîn ve sâirleri ile re‘âyâdan Ustabaşı Yani v. Sava ve Usta Simyon v. Todori ve Vasil v. Panayot zimmîler ve sâirleri haberleriyle zâhir ve mukarrer olan yine esnâf-ı mezkûreden işbu bâ‘isü’l-kitâb Yüzbir Mustafa Ağa b. Hüseyin hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb -tûbâ-lehû ve hüsnü-meâb- efendi hazretleri dahi esnâf-ı mezkûrelerine iltimâslarıyla kethudâ nasb ve ta‘yîn ve esnâfından kimesneye hilâf-ı şer‘-i şerîf ve mugāyir-i rızâ te‘addî ve rencîde etmemek üzere emr ü tenbîh buyurduklarında ol dahi kethudâlık-ı merkūmu kabûl ve ber-mûceb-i emr ü tenbîh amel ve harekete ta‘ahhüd etmeğin mâ-vaka‘a [bi’t-taleb ketb olundu.] Fî 13 Şevvâl sene 1238. Şühûdü’l-hâl: Muhzır Hüseyin, Muhzır Mahmud.