İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 334 Hüküm no: 320 Orijinal metin no: [73b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todori v. Ayan’ın bakkal dükkânı gediğini Esbir v. Koti’ye sattığı Mübâya‘a-i bakkāl Mahmiye-i İstanbul’da kâin bakkāl esnâfından Todori v. Ayan nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’l-rakīm Esbir v. Koti muvâcehesinde ikrâr-ı tam ve takrîr-i kelâm edip mahmiye-i mezbûrede cennet mekân firdevs-âşiyân merhûm-ı mağfiret-nişân Ebu’l-feth Sultan Mehmed Han -tâbe serâhû- hazretlerinin câmi‘-i şerîfleri havlısı ebvâbından Boyacıkapısı hâricinde vâki‘ yeni dükkân demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzımenin yüz yirmi sehm i‘tibâriyle otuz sehmi müştereken gāibân ani’l-meclis İstavri ve Nikola zimmîlerin ve otuz sehmi işbu hâzır bi’l-meclis Yuvan zimmînin mâlları olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye benim yedimde mâlım olan altmış sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile şürekâ-ı mesfûrun izin ve icâzetleri ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle bin beş yüz guruşa mesfûr Esbir zimmîye bey‘ ve temlik ve vech-i lâyıkı üzere teslîm ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin beş yüz guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i [74a] da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle ba‘de’l-yevm âlât-ı lâzıme-i mezkûreden i‘tibâr-ı merkūm üzere altmış sehm hisse-i şâyi‘ada benim kat‘a alâkam kalmayup mesfûr Esbir zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 2 Ramazan sene 1238. Şühûdü’l-hâl: Pazarbaşı Süleyman Ağa, Bölükbaşı Abdi Ağa, Kâtib Ahmed Efendi.