İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 343 Hüküm no: 331 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Zaharya’nın bakkal dükkânını Hıristo v. Yasef’e sattığı Bakkāl Mahmiye-i İstanbul’da kâin bakkāl esnâfından Yorgi v. Zaharya nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Hıristo v. Yasef nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Çırçır nâm mahâlde kâin Mustafa Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle otuz sehmi diğer Yorgi zimmînin mâlı olmağla mâ‘adâsı olup akd-i âti’z-zikrin sudûruna değin benim mâlım olan doksan sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîkim mesfûrun izin ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle bin iki yüz guruşa mersûm Hıristo zimmîye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin iki yüz guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î << ve safka-i vâhide >> ile kabûlü hâvî ibrâ ve iskāt [76b] dahi etmemizle fîmâ-ba‘d zikr olunan doksan sehm hisse-i şâyi‘ada benim kat‘a alâkam kalmayup mesfûr Hıristo zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 12 Şevvâl sene 1238. Şühûdü’l-hâl: Pazarbaşı Süleyman Ağa, Bölükbaşı Molla Abdi, Kâtib Ahmed Efendi.