İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 344 Hüküm no: 333 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. Mustafa’nın helvacı dükkânını Seyyid Ali Usta b. Ali’ye sattığı Mübâya‘a-i helvacı Mahmiye-i İstanbul’da kâin helvacı esnâfından İsmail Ağa b. Mustafa nâm kimesne meclis-i şer‘-i şerîf-i enverde yine esnâf-ı merkūmeden işbu bâ‘isü’l-vesîka es-Seyyid Ali Usta b. Ali nâm kimesne mahzarında ikrâr-ı tam ve takrîr-i kelâm edip mahmiye-i İstanbul hısnı ebvâbından Samatya kapısı dâhilinde Hacı Hüseyin mahallesinde kale ittisâlinde vâki‘ ma‘lûmü’l-hudûd bir bâb helvacı ve turşucu dükkânı derûnunda mevcûde beyne’l-hıref helvacı gediği ta‘bîr olunur iki kebîr bıçak ve üç mermer taş ve iki terâzî ma‘a derâhim ve bir peştahta ve üç fıçı ve bir kebîr kazgan ile turşucu gediği ta‘bîr olunur bir destgâh ve bir satır ve üç koğa ve üç şişe ve sâir âlât-ı lâzıme-i ma‘lûmelerin nısfları işbu hâzır bi’l-meclis Hüseyin Ağa b. Mehmed’in yedinde mâlı ve mülkü olmağla mâ‘adâsı olup akd-i âti’z-zikrin sudûruna değin yedimde mâlım ve mülküm olan nısf hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîkim hâzır-ı mezbûrun izniyle merkūm es-Seyyid Ali Ağa’ya dört bin beş yüz guruşa bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı mezkûr dört bin beş yüz guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i ma‘lûmelerin nısf-ı şâyi‘a-i mezkûrelerinde benim kat‘a alâka ve medhalim kalmayup merkūm es-Seyyid Ali Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 10 Şevvâl sene 1238. Şühûdü’l-hâl: Kethudâ İsmail Ağa, Yiğitbaşı Mehmed Ağa, Üsküdarlı İsmail Ağa, Küçükkaramanlı es-Seyyid Ali Ağa, Üsküdarlı Ahmed Ağa, Kumkapılı Hüseyin Ağa, Galata’da Mehmed Ağa, Alacahammâmlı Halil Ağa ve gayruhum.