İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 345 Hüküm no: 334 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Kara Mustafa b. Süleyman’ın evindeki eşyaları Hadice Hanım bt. Hafız İsmail Efendi’ye sattığı Eşyâ mübâya‘ası Husûs-ı âti’l-beyânın mahâllinde ketb ü tahrîri içün savb-ı şer‘-i enverden bi’l-iltimâs me’zûnen irsâl olunan Başkâtib Mevlana İbrahim Ârif Efendi mahmiye-i İstanbul’da Kırkçeşme kurbünde Sekbânbaşı İbrahim Ağa mahallesinde vâki‘ Kastamonu tüccârından Evliyâzâde Hafız Mehmed Ağa b. Mehmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde fi’l-asl vilâyet-i Anadolu’da Bolu sancağında Gerede kazâsına tâbi‘ Doğancılar karyesi ahâlisinden olup menzil-i mezkûrda müsâfireten sâkin ve zâtı Yağlıkçı Kulzâde Mehmed Şakir Efendi b. el-Hâc Hüseyin ve Döğmeci Kırımî Ahmed Ağa b. İbrahim nâm kimesneler tarfileriyle mu‘arrefe olan Zeyneb bt. Kara Mustafa oğlu Süleyman nâm hatun meclis-i ma‘kūd-ı mezkûrda bâ‘isetü’l-vesîka Hadice Hanım bt. el-merhûm Hafız İsmail Efendi’nin zevci ve tarafından zikri âtî husûsu tasdîkiyle vekîl-i şer‘îsi mezbûr Hafız Mehmed Ağa mahzarında ikrâr-ı tam ve takrîr-i kelâm edip ben on beş seneden beri zevcân-ı mezbûrânın menzillerinde müsâfireten sâkine olup hukūk-ı şer‘iyeden mezbûrânın zimmetlerinde bir akçe ve bir habbe hakkım ve alacağım olmadığından mâ‘adâ bu defa işbu akd-i meclis-i şer‘-i âlî olunan menzil derûnunda mevcûde eşyâ-i memlûkemden mecmû‘u müsta‘mel sarılı güğezli beyazlı bir fermâyiş donluk şal ve gül zarflı hilâlî bir İngiliz koyun sâ‘ati ve biri altı parmak ve biri yazma iki entari ve bir şalı ve biri yazma iki şalvar ve bir mor çuka ferâce ma‘a yaşmak ve bir nîm mâi gezi kaplı pehle zağralı Rumeli nâfesi kürk ve iki minder ve bir kıtık memlû’ İstanbul cibini [ve] altı yastık ve bir çit baş yastığı ve bir çit döşek ve bir çit şilte ve bir döşek çârşâbı ve üç çit yorgan ma‘a çârşâb ve beş sahan ma‘a kapak ve bir şorba nühâsı ma‘a kapak ve üç tencere ma‘a kapak ve üç çit kadayıf tepsisi ve bir ta‘âm sinisi ve bir nühâsî mangal ve bir leğen ma‘a ıbrığı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile müvekkile-i mezbûre Hadice Hanım’a bin yüz guruşa bey‘ ve temlik ve yedimde emvâlim olup işbu meclis-i şer‘de mu‘âyene olunan istirâya resmi sîm üzerine masnû‘ elmas ve la‘l taşlı iki başlı bir kuşak ma‘a sırmalı kolan ve altın üzerine masnû‘ etrâfı elmaslı bir çift zümrüd küpe ve altın üzerine masnû‘ bir elmas gül yüzük ve bir kılâbdân harclı Selîmiye entari ile nakid altı bin yüz guruşumu dahi hibe-i sahîha-i şer‘iye ile yine müvekkile-i mezbûre Hadice Hanım’a hibe ve temlik ve her birini bundan akdemce kendüye teslîm eylediğimde ol dahi ber-minvâl-i muharrer iştirâ ve meclis-i hibede bilâ-mâni‘ ittihâb ve temellük ve tesellüm ve kabz ü kabûl eyledikden sonra semeni olan meblağ-ı mezkûr bin yüz guruş mutâlebesine ve hukūk-ı sâire-i şer‘iyeye müte‘allika âmme-i de‘âvîden müvekkile-i mezbûre Hadice Hanım ile zevci vekîl-i merkūmun zimmetlerini ibrâ-i âmm-ı sahîh-i şer‘î ile kabûllerini hâvî ibrâ ve iskāt eyledim ba‘de’l-yevm eşyâ-i muharrere-i mezkûre ve evânî-i nühâsiye müvekkile-i merkūme Hadice Hanım’ın emvâl-i müşterâsı ve zikr olunan kuşak ma‘a kolan zümrüd küpe ve gül yüzük ve entari ile nakd-i merkūm altı bin yüz guruş dahi emvâl-i mevhûbesi ve hakk-ı sırfı olup benim aslâ ve kat‘a alâka ve medhalim kalmadığından mâ‘adâ efendi-i mezkûr derûnunda mevcûde bi’l-cümle mefrûşât ve melbûsât ve evânî-i nühâsiye ve gayr-ı nühâsiyenin mecmû‘u müvekkile-i mezbûre Hadice Hanım’ın emvâli olup benim üzerime lâbise olduğum köhne libâsımdan gayri ism-i mâl ıtlâk olunur nesnem yokdur dedikde gıbbe’t-tasdîki’ş-şer‘î vâkı‘u’l-hâli mevlana-yı mezbûr mahâllinde ketb ü tahrîr ve ma‘an meb‘ûs ümenâ-i şer‘den Çukadâr Osman Ağa b. Halil ve Molla Salih b. İbrahim ile meclis-i şer‘a [gelip] inhâ ve takrîr etmeğin mâ-vaka‘a [bi’t-taleb ketb olundu.] Fî 10 Şevvâl sene 1238. Şühûdü’l-hâl: Battalzâde Mustafa Ağa b. Ahmed, Kastamonulu tüccârından Hacı Bıyıkzâde Hafız Mehmed Ağa b. el-Hâc Mehmed, Kastamonî el-Hâc Yusuf Ağa b. el-Hâc Hasan, Anadolu kuzât-ı eşrâfından Kapı Kethudâsı Hafız Hasan Şükrü Efendi b. İbrahim, Bogasici Kethudâsı Mehmed Âtıf Efendi b. Hasan, sâbıkā Burusa Kadısı Yalvâcî fazîletlü es-Seyyid Mehmed, Sarrâc el-Hâc Ömer Ağa, el-Hâc Mehmed Derviş Ağa, el-Hâc Hafız Osman Efendi b. Ömer, Molla Mehmed b. Ahmed, Molla Hüseyin b. İbrahim, Molla Mehmed b. Mustafa, es-Seyyid Abdullah Efendi b. Hafız Mehmed Said ve gayruhum.